Prezıdent teleradıokesheni «Salamatty Qazaqstan» áleýmettik jobasynyń negizgi aqparattyq seriktesi boldy

ALMATY. QazAqparat- Búgin «Almaty-2» temirjol vokzalynan «Salamatty «Qazaqstan» poıyzy» saltanatty túrde jolǵa shyqty, dep habarlaıdy QazAqparat tilshisi.

«Medıtsınalyq poıyz» jobasynyń basty maqsaty - elimizdiń shalǵaı aýdandarynyń turǵyndaryna tegin medıtsınalyq kómek kórsetý.

Ult myqty bolý úshin adamdardyń deni saý bolýy kerek. Deni saý ulttyń bolashaǵy zor bolmaq. Prezıdent Qasym-Jomart Toqaev Qazaqstannyń baılyǵy eń aldymen adamdar ekenin atap ótti. Memlekettiń basym mindetteriniń biri – ómir súrý sapasyn jaqsartý jáne uzaq ómir súrýge jaǵdaı jasaý. Bul bilikti medıtsınalyq qyzmetterge qol jetkizýdi qamtamasyz etýge múmkindik beredi.

Jobany «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń jáne Densaýlyq saqtaý mınıstrliginiń qatysýymen, «Qazaqstan temir joly» UK» AQ janyndaǵy «Áleýmettik jobalar qory» korporatıvtik qorymen jáne aqparattyq seriktes - Jibek Joly telearnasymen birge júzege asyrady.

Mańyzy zor aýqymdy áleýmettik jobanyń negizgi aqparattyq seriktesi. QR Prezıdentiniń Teleradıokesheni.

«QR Prezıdentiniń TRK bas aqparattyq seriktes retinde óziniń barlyq medıaresýrstaryn iske qosatyn bolady. Eń aldymen, Jibek Joly telearnasy men «QazAqparat» HAA múmkindikterin atap ótken jón. Bizdiń pıar-tobymyz medıtsına poıyzynyń qyzmeti týraly aqparatpen halyqty egjeı-tegjeıli habardar etedi. Biz Qazaqstan turǵyndarynyń osy áleýmettik joba týraly, onyń qoǵam men memleket úshin mańyzdylyǵy týraly múmkindiginshe kóbirek aqparat berýge tyrysamyz»,- dep atap ótti «QR Prezıdentiniń TRK» kreatıvti dırektory Ásel Tursynǵazına.

Ásel Tursynǵazınanyń sózinshe, QR Prezıdentiniń TRK-de joba sátti aıaqtalǵanǵa deıin medıtsına poezynyń jumysyn aýqymdy aqparattyq qoldaýdy qamtamasyz etý boıynsha barlyq qajetti resýrs bar.

«Búgin medıtsınalyq kómekke zárý kóptegen adamdar úshin óte mańyzdy kún. Kóbinese shalǵaı aýyldarda aýrýhanalar bolmaıdy jáne turǵyndardyń barlyǵy ár ýaqytta aýdan ortalyǵyna bara almaıdy. Al medıtsınalyq poıyz jaǵdaıynda balalardy qaratyp, eresekterdiń ózderiniń de barlyq mamannan birden keńes alýdyń jaqsy múmkindigi týyndaıdy. Poıyzǵa eń zamanaýı medıtsınalyq jabdyqtar qoıyldy», - dep atap ótti «Samruk-Kazyna Trust» áleýmettik jobalardy damytý qorynyń bas dırektory Alfııa Adıeva.

Aıtýynsha, medıtsınalyq brıgadalar dıagnostıkalyq protsedýralar ǵana emes, sondaı-aq shaǵyn ambýlatorııalyq operatsııalar jasaıdy.

«Bıyl 75 myńǵa jýyq aýyl turǵynyna 35 medıtsına mamany qyzmet kórsetedi. Onyń ishinde terapevt, hırýrg, jalpy tájirıbe dárigeri, nevropatolog, ýltradybystyq dıagnostıka dárigeri, akýsher, zerthanashy, meıirbıke, rentgenolog, sáýlelik dıagnostıka dárigeri, tis dárigeri, otolarıngolog, psıholog, okýlıst, gınekolog jáne ýrolog bar. Medpoıyz qozǵalysynyń kestesi shalǵaı stantsııalarda medıtsınalyq pýnktterdiń joqtyǵyn eskere otyryp jáne azamattar men memlekettik organdardyń ótinishi negizinde ázirlendi»,- deıdi Alfııa Adıeva.

«Salamatty Qazaqstan» poıyzy, osy jyldyń 6 jeltoqsanyna deıin búkil Qazaqstan boıynsha 120-dan astam stantsııany qamtymaq.

«Halyqty qabyldaý búginen bastalady. Alǵashqy toqtaıtyn stantsııamyz «Qopa». Sońǵy beketke jospar boıynsha 6 jeltoqsan kúni baramyz. Bizde medıtsınalyq kómek kórsetýge barlyq jaǵdaı jasalǵan. Dárigerler adamdardy emdeýge, keńes berýge tolyq daıyn. Medıtsınalyq poıyz stantsııalarda 1-2 kún aıaldaıdy. Dárigerler turǵyndardy jumys ýaqytynda qabyldaıdy»,- dedi dáriger Dana Nurjanqyzy.

Bıyl «Salamatty Qazaqstan» poıyzynda zańgerler keńes beredi.

«Áıelder isteri jáne otbasylyq-demografııalyq saıasat jónindegi ulttyq komıssııanyń bastamasymen alǵash ret, «Salamatty Qazaqstan» medıtsınalyq poıyzynyń jumysyna, azamattarǵa tıimdi psıhologııalyq, quqyqtyq ári medıatıvtik (tatýlastyrý) kómek kórsetetin kásibı jáne tájirıbeli medıatorlar men zańgerler tartyldy. Budan basqa, azamattardyń memlekettik áleýmettik qoldaý alý quqyǵyn qorǵaý, zeınetaqy-járdemaqy, áleýmettik tólem jáne ataýly áleýmettik kómek alý máseleleri boıynsha tegin keńes beriledi»,- dedi «Samuryq-Qazyna» AQ kompanııa ókili.

«Samuryq-Qazyna» AQ qoldaýynyń arqasynda densaýlyq poıyzdarynyń shalǵaı stantsııalardyń turǵyndaryna joǵary bilikti medıtsınalyq kómek kórsetýi ıgi dástúrge aınaldy. Tek 2022 jyldyń qorytyndysy boıynsha 150-ge jýyq stantsııanyń 80 649 turǵyny emdik-keńes berý qyzmetin aldy. Onyń 21 867-si bala. Bul rette 5 097 adamǵa shaǵyn ota jasaldy.

«Qyzmetimizdiń basty maqsaty – «Samuryq-Qazyna» kompanııalar toby kásiporyndary bar óńirlerge erekshe nazar aýdara otyryp, halyqtyń áleýmettik-ekonomıkalyq ómirin jaqsartý. Osy jyly 7 jobanyń ishinde densaýlyq saqtaý baǵytynda 590 mıllıon teńge bıýdjetpen «Medıtsınalyq poıyz» jobasyna basymdyq beriledi, - dep jetkizdi Alfııa Adıeva.