Prezıdent Teleradıokesheni jańa maýsymyn ashty – Kazinform, Jibek Joly qandaı jobalar usynady
Tusaýkeserge Prezıdenttiń ishki saıasat jáne kommýnıkatsııalar máseleleri jónindegi keńesshisi Rýslan Jeldibaı jáne Mádenıet jáne aqparat mınıstri Aıda Balaeva, otandyq BAQ basshylary, medıaındýstrııa men estrada juldyzdary, Parlament depýtattary, keldi.
«Adamzat tarıhynda qarqyndy damyp, kún saıyn ózgerip otyrǵan eki sala bolsa, onyń biri — aqparat pen medıa. Osydan 30 jyl buryn elimizde eki telearna, 10-15 shaqty gazet-jýrnal bolsa, búginde BAQ sany bes myńnan asty. Demek barlyq buqaralyq aqparat quraldary úlken básekelestik jaǵdaıda jumys istep, ózderiniń oqyrmandary men kórermenderi úshin atsalysyp júrgeni sózsiz. Sonyń ishinde ótken jyly rebrendıng jasap, kórermenderdiń kózaıymy bolǵan Jibek joly arnasy — úlken ujymnyń táýlik boıy úzdiksiz jumys isteýiniń nátıjesi. Jańa maýsym telekórermenderdiń kóbeıýine yqpal eteri sózsiz. Tutas ujymǵa shyǵarmashylyq tabys tileımin, denderińiz saý, otbasylaryńyz aman bolsyn. Elimizdiń damyp-órkendeýi jolynda jaqsy aqparatty tarata berińizder», — dedi QR Mádenıet jáne aqparat mınıstri Aıda Balaeva óz quttyqtaýynda.
Al Prezıdenttiń ishki saıasat jáne kommýnıkatsııalar máseleleri jónindegi keńesshisi Rýslan Jeldibaı Jibek Joly arnasynyń az ýaqytta ósý jolyna toqtaldy.
«Bir jyl buryn osy telearnany ashý ıdeıasy qalaı paıda bolǵany, telearna ataýy, logotıpinen bastap, qalaı oılastyrylǵany kóz aldymda ótti. Sondyqtan bul úlken jumys. Árıne bir jyl — qazirgi álem úshin qas-qaǵym sát. Biraq az ǵana ýaqytta Jibek joly arnasynyń osyndaı deńgeıge kóterilýi — úlken maqtanysh. Sondyqtan telearna ujymyna shyn júregimmen alǵys aıtamyn. Prezıdenttiń baspasóz hatshysy qyzmetinde júrgenimde osyndaǵy árbir qyzmetkerdiń eńbegin jaqsy bilemin, jańa ǵımaratqa barǵanda da tanysqanmyn. Telearnaǵa tek shyǵarmashylyq tabys tileımin», — dep quttyqtady QR Prezıdentiniń ishki saıasat jáne kommýnıkatsııalar boıynsha keńesshisi Rýslan Jeldibaı.
QR Prezıdenti teleradıokesheniniń bas dırektory Raýshan Qajybaeva ujymnyń sońǵy bir jylda birneshe baǵytta qatar damyp, biregeı medıaholdıngke aınalǵanyn atap ótti.
«Bizdiń medıaresýrstar túrli ortaǵa arnalǵan san alýan kontent ázirleıdi. Sol úshin de joǵary senimge ıe. Búginde teledıdarǵa suranys azaıǵany jóninde kóp aıtylady, oǵan bizdiń aıtarymyz — kórermenge jetkizý tásili emes, konenttiń ózi mańyzdy. Muny jekelegen telearnalardyń mańyzdy jobalar arqyly jalpy kórsetkishterdi arttyrýy mysalynda kórip otyrmyz. Shyn máninde bizdiń úlken maqtanyshymyz — Silk Way Cinema jobasy. Munda alǵash ret otandyq telekompanııalardyń, kınostýdııalardyń úzdik jobalarynyń úlken kitaphanasy jınaldy. Osy jobaǵa úles qosqan barlyq áriptesterimizge, barlyq qazaqstandyq medıaǵa alǵys bildiremiz. Búgingi tańda Silk Way Cinema arnasy álemniń 10 elinde habar taratady jáne biz onyń geografııalyq aýqymyn keńeıtemiz», — dedi Raýshan Qajybaeva.
Bas dırektor 103 jyldyq tarıhy bar Kazinform halyqaralyq aqparat agenttigi qazaqstandyqtar úshin álemdik oqıǵalardyń, sheteldik aýdıtorııa úshin — Ortalyq Azııadaǵy oqıǵalardyń qaınar kózi bolyp qala beretinin jetkizdi.
Agenttik oqyrman nazaryna kúnine 400-ge jýyq materıal usynady.
Qazirgi ýaqytta Kazinform — 5 tilde jańalyq taratatyn aqparattyq portal ǵana emes, túrli janrdaǵy saraptamalyq zertteýlerdiń, ózekti bastamalar men eksklıýzıv pikirler derekkózi.
«Álemniń 11 elinde agenttiktiń menshikti tilshileri bar, sondyqtan bizdiń basty mindetimiz — Qazaqstan men Ortalyq Azııa óńirindegi oqıǵalardy sheteldik aýdıtorııaǵa jetkizý. Jańa jyldan bastap, agenttiktiń aǵylshyn tilindegi redaktsııasyn edáýir kúsheıtetin bolamyz. Biz Qazaqstan óńiri men Ortalyq Azııa jańalyqtary bar aǵylshyn tilindegi Telegram arnasyn iske qosamyz», — dedi Raýshan Qajybaeva.
Kazinform jańa aqparat maýsymyn jańa transformatsııamen bastady. Agenttiktiń syrtqy kelbetinen bastap ishki mazmuny túbegeıli ózgerdi.
Búginde agenttik oqyrmandary álemniń 100-den astam elinde júrip, jedel ári senimdi aqparatty kez kelgen qurylǵydan jeńil ári ońaı ala alady.
«Kazinform jańa maýsymǵa ǵana emes, damýdyń jańa kezeńine aıaq basty. Jańashyldyqtar vızýaldy jáne tehnıkalyq turǵyda da júrdi, damý men jetildirýdi jalǵastyratyn jańa platforma ashyldy. Oǵan qosa, redaktsııalyq saıasatta da ózgeris bar: aqparat berý tásilin ózgerttik, mýltımedıalyq kontentke basymdyq berip, mazmundy ári tolyqqandy ete túsemiz. Ádettegi lentalyq aqparat óndirisinen Qazaqstan, Ortalyq Azııa jáne búkil álem boıynsha biregeı jáne eksklıýzıvti kontent berýge aýysamyz. Biz úlken beıneaqparat agenttigi bolýǵa da tyrysamyz. Kazinform — qazaqstandyq BAQ-tyń básekelesi emes, biz eldiń aqparat alańyndaǵy seriktespiz. Barlyǵymen yntymaqtastyq ornatýǵa, eksklıýzıvti aqparatpen almasýǵa daıynbyz. Bul rette Kazinform óziniń basty qasıeti — senimdilikti ustanady. Bizben birge bolǵanyńyzǵa rahmet», — dedi Kazinform halyqaralyq aqparat agenttiginiń basqarýshy dırektory Asqar Jaldınov.
Jańa maýsymda Prezıdent teleradıokesheni qurylymynda birden úsh telearna jumysyn bastady.
Olar — Jibek Joly otbasylyq arnasy, álemniń 100-den astam elinde aýdıtorııasy bar Silk Way spýtnıktik arnasy jáne Silk Way Cinema spýtnıktik kınoarnasy.
2022 jyldyń 1 qyrkúıeginde efırge shyqqan «Jibek Joly» telearnasy habar taratqan bir jylda qazaqstandyq basty arnalardyń tiziminen kórinip, reıtıngte TOP ondyqqa endi.
Telearnanyń úlesi qazir 7 ese artqan.
Jańa maýsymda Jibek Joly telearnasy aqparattyq-saraptamalyq baǵdarlamalardy, tanymal tok-shoýlar men kıno-serıaldar toptamasyn usynady.
Mysaly, balaly bolǵysy kelgen otbasylar qamyn Láılá Sultanqyzy oılaıdy, shetel asqan qarakózderdiń otanymen baılanysyn Janar Baısemiz ornatady.
«Meniń aýdanym» jobasy el aýdandaryn aralap, halyqpen tildesedi.
Al «Ýáde» baǵdarlamasynyń júrgizýshisi Erbolat Muhamedjan mınıstrlermen jáne ákimdermen tildesedi.
Kúndizgi efırdi Nurlan ımam Baıjigituly, keshki efırdi Nurlan Qoıanbaev tizgindemek. Bul — qanshama kontenttiń bir bóligi ǵana.
«Búgingi sharanyń „Jańa baǵyt“ dep atalýynyń sebebi bar. Bul Jibek Joly arnasy úshin jańa izdenister, jańa baǵyttar men baǵdarlamalar bolsa, Silk Way arnasy úshin — basqa elderge taralý aımaqtarynyń ulǵaıýy boldy. Bıyl biz Ázerbaıjan eliniń 14 paketine endik, Ulybrıtanııa jáne kórshiles Qyrǵyzstannyń tsıfrlyq efırine endik. Osyǵan deıin Silk Way telearnasy Reseı, Grýzııa, Latvııa, Polsha jáne Birikken Arab Ámirlikteriniń efırlik bazasyna engen bolatyn. Taǵy atap óterligi, ınternet-pakette biz álemniń 122 elinde barmyz. Silk Way telearnasy 5 tilde habar taratady, jańa jyldan bastap túrik tilinde habar taratýdy bastaıdy. Qazir aýdarmashylar barlyq kontentti aýdaryp jatyr. Jibek Joly arnasynyń negizgi konenti — halyqtyń kóńilinen shyǵatyn janrlar, sonymen qatar biz elimizdiń qoǵamdyq-aqparattyq ıdeologııasyna negizdelgen jobalardy usynýǵa tyrysyp kelemiz. „Silk Way Cinema“ telearnasynyń da bolashaǵy áli alda, bul rette elimizdiń barlyq kınogerleri men prodıýserlerin áriptes bolýǵa shaqyramyn», — dedi «Jibek Joly — Silk Way» arnasynyń basqarýshy dırektory Erkejan Kúntýǵanqyzy.
Sondaı-aq, QR Prezıdent teleradıokesheniniń Derekti kıno ortalyǵy — Memleket basshysynyń jumysynan aqparattyq qamtamasyz etý men memleket damýynyń basym baǵyttaryn túsindirý boıynsha eńbek etetin qurylym.
Tek bir jylda ortalyq 40-tan astam qysqa jáne tolyq metrajdy fılmder túsirgen. Onyń barlyǵy elimizdegi telearnalarda kórsetilip shyqty.
Derekti kıno ortalyǵy komandasynyń jobalary túrli halyqaralyq baıqaýlarda top jaryp keledi.
Bıyl ortalyqtyń «Kaspıı ıtbalyǵy nege qyrylyp jatyr» derekti fılmi «Zılant» halyqaralyq kınofestıvaliniń júldegeri atandy, al «Baqytty balalyq» — reseılik «Belaıa ptıtsa» festıvaliniń úzdik balalar derekti lentasy bolyp tanyldy.
«Prezıdent Teleradıokesheni — asa qýatty resýrs, al Derekti kıno ortalyǵy — bizdiń medıkompanııanyń jeke óndiristik bazasy. Bizdiń birinshi mindetimiz — Memleket basshysynyń qyzmeti jaıly medıakontent ázirleý. Biz resmı hronıkany túrlendirip, tartymdy derekti kınoǵa aınaldyramyz. El Prezıdentiniń qatysýymen ótetin mańyzdy oqıǵalar men protsessterden aqparattyq qoldaý kórsetýdi qamtamasyz etemiz. Bizdiń derekti fılmderde memlekettiń áleýmettik-ekonomıkalyq strategııasy qalaı júzege asyrylyp jatqany, jańa Qazaqstannyń jarqyn sátteri baıandalady. Bizdiń qaharmandar — shynaıy adamdar. Olar ózderiniń turmys-tirshiligin, bolashaqqa josparyn áńgimeleıdi», — deıdi Derekti kıno ortalyǵynyń jetekshisi Aqylbek Aralbaıuly.
Saltanatty tusaýkeser keshi otandyq estrada juldyzdarynyń merekelik kontsertine ulasty.
Aıta keteıik, QR Prezıdentiniń Teleradıokesheni 1996 jyly Memleket basshysynyń qaýlysymen qurylǵan.