Prezıdent teleradıokesheni men Túrikmenstannyń TDH agenttigi seriktes boldy

<p>ASTANA.KAZINFORM &ndash; 10 qazan kúngi Memleket basshysy Qasym-Jomart Toqaevtyń Túrikmenstanǵa resmı sapary barysynda Ashhabadta Qazaqstan Respýblıkasy Prezıdentiniń Teleradıokesheni jáne Túrikmenstannyń Memlekettik aqparat agenttigi (TDH) ózara túsinistik týraly memorandýmǵa qol qoıdy.</p>

Qujatqa QR Prezıdenti teleradıokesheniniń dırektory Raýshan Qajybaeva men TDH agenttiginiń tóraǵasy Merdan Gazakbaev qol qoıdy.

- Búgin qol qoıylǵan memorandým medıakontent almasýdy jáne eki eldiń ómirindegi mańyzdy oqıǵalardy kórsetýde ózara yqpaldastyqty kózdeıdi, - dedi Raýshan Qajybaeva.

Memorandým sonymen qatar birlesip kontent jasaýdy, jýrnalısterdi oqytý men taǵylymdamadan ótkizý, korrespondenttik jeli resýrstaryn birlesip paıdalaný maqsatyn kózdeıdi. Prezıdent TRK quramyna kiretin "Kazınform" Halyqaralyq aqparat agenttigi TDH agenttigimen uzaq ýaqyttan beri baılanysta ekenin, TMD aqparattyq keńesi aıasyndaǵy ózara is-qımyldyń mol tájirıbesi bar ekenin atap ótken jón.

- TDH men QR Prezıdenti TRK arasyndaǵy yntymaqtastyq Ortalyq Azııanyń aqparattyq keńistigin damytýǵa, halyqtarymyzdyń dostyǵy men ózara túsinistigin nyǵaıtýǵa baǵyttalǵan Túrkimenstan men Qazaqstan arasyndaǵy strategııalyq áriptestik rýhyna sáıkes keledi, - dep atap ótti TDH agenttiginiń tóraǵasy Merdan Gazakbaev.

Aıta keteıik, QR Prezıdentiniń teleradıokesheni – tolyq tsıkldi qazaqstandyq iri medıa-kompanııa, onyń quramyna: «JibekJoly» respýblıkalyq telearnasy, SilkWay jáne SilkWayCinema halyqaralyq telearnalary, «QazAqparat» HAA jáne Derekti fılmder ortalyǵy kiredi.

Túrikmenstannyń Ortalyq memlekettik aqparat agenttigi (TDH) memlekettiń qoǵamdyq-saıası, áleýmettik-ekonomıkalyq, mádenı jáne sport ómirindegi oqıǵalar týraly aqparatty túrikmen, orys jáne aǵylshyn tilderinde taratady.