Prezıdent: Táýelsizdiktiń ekinshi onjyldyǵy Qazaq eliniń órleý kezeńine aınaldy

NUR-SULTAN. QazAqparat – Táýelsizdiktiń ekinshi onjyldyǵy – Qazaq eliniń órleý kezeńi. Memleket basshysy Qasym-Jomart Toqaev QR Táýelsizdiginiń 30 jyldyǵyna arnalǵan saltanatty jıynda osyndaı pikir bildirdi, dep habarlaıdy QazAqparat.

«Ekonomıkany órkendetý úshin aýqymdy reformalar qolǵa alyndy. Jeke kásipkerliktiń damýyna jaǵdaı jasaldy. Jastarymyz álemniń úzdik ýnıversıtetterine oqýǵa jiberildi. Qazynaly Ulttyq qorymyz quryldy. Uly kóshke jol ashylyp, shette júrgen qandastarymyz atamekenine qaıtaryldy.

Ekinshi onjyldyq – Qazaq eliniń órleý kezeńi. Biz keregemizdi keńeıtip, tuǵyrymyzdy nyǵaıttyq. Halyqtyń ál-aýqatyn arttyra tústik. Tól tarıhymyzdy túgendep, rýhanı muramyzdy jańǵyrttyq. Kóptegen halyqaralyq jobaǵa bastama kóterdik. Elge qomaqty ınvestıtsııa ákeldik», - dedi Prezıdent saltanatty shara barysynda.

Memleket basshysynyń paıymynsha, Táýelsizdiktiń úshinshi onjyldyǵy Qazaqstannyń kemeldený kezeńi boldy.

«Osy ýaqytta abyroı-bedeli artqan mereıli memleketke aınaldyq. Shekara máselesin birjola sheshtik. 2050 jylǵa deıingi strategııamyzdy qabyldap, damyǵan elderdiń qataryna qosylýdy mejeledik. «Rýhanı jańǵyrý» arqyly ulttyń jańa bolmysyn qalyptastyrýdy qolǵa aldyq. Tutas túrkiniń altyn besigi atanǵan Túrkistandy túlettik. Saıası reformalardy tyń qarqynmen jalǵastyrdyq. Halqymyzdyń sany 19 mıllıonnan asty. Osylaısha, Qazaqstan tuǵyry berik, myqty memleket boldy», -dedi Qasym-Jomart Toqaev.