Prezıdent tapsyrmasyn oryndaımyz – Danıal Ahmetov Buqtyrmaǵa kópir salý jaıynda

NUR-SULTAN. QazAqparat – Shyǵys Qazaqstan oblysynyń ákimi Danıal Ahmetov Kúrshim aýdanyna aparatyn Qyzyl tý ótkeline kópir mindetti túrde salynatynyn málimdedi, dep habarlaıdy QazAqparat tilshisi.

«Kópir týraly másele bizge belgili. Prezıdenttiń tapsyrmasyn sózsiz oryndaımyz. Qazirgi kezde jobamyz bar. Az ýaqyttyń ishinde ózimizdiń arnaıy protsedýramyzdy ótkizemiz. Meniń oıymsha, osy jobaǵa bıýdjetten qarajat bólinedi. Múmkin oǵan basqa eldiń ınvestory tartylady», - dedi Danıal Ahmetov búgin Ortalyq kommýnıkatsııalar qyzmetinde ótken baspasóz máslıhatynda.

Oblys ákimi kópir qurylysynyń jobasy boıynsha tenderlik protsedýra ótkiziletinin aıtyp ótti.

Eske sala ketsek, buǵan deıin Memleket basshysy Qasym-Jomart Toqaev Úkimetke Shyǵys Qazaqstan oblysynyń ákimdigimen birge Buqtyrma sý qoımasy arqyly kópir salý úshin qarjy bólý máselesin qarastyrýdy tapsyrǵan bolatyn.

«Egemen Qazaqstan» gazeti ShQO Kúrshim aýdanynyń 20 myńnan astam turǵynyn tolǵandyrǵan ózekti máseleni kóterdi. Halyq 50 jyl buryn salynǵan eski parommen qatynap júr. Úkimetke ShQO ákimdigimen birge Buqtyrma sý qoımasyna kópir salý úshin qarjy bólý máselesin qarastyrýdy tapsyramyn», - dep jazdy Qasym-Jomart Toqaev.