Prezıdent tapsyrmasymen Balqashqa avıareıster sýbsıdııalanady

QARAǴANDY. QazAqparat – Prezıdent Qasym-Jomart Toqaev Qaraǵandy oblysynyń jurtshylyǵymen kezdesý barysynda Balqashtyń týrıstik áleýetin arttyrýǵa baǵyttalǵan tapsyrma berdi, dep habarlaıdy QazAqparat tilshisi.

«Jaz maýsymynda Balqashqa qatynaıtyn áýe reısteriniń bıletterin sýbsıdııalaý máselesin pysyqtaǵan jón. Qalanyń áýe aılaǵy el áýejaılaryn damytý baǵdarlamasyna engizilýi kerek», - dedi Prezıdent.

Sondaı-aq, Memleket basshysy qalaǵa qatynaıtyn jańa áýe jáne temirjol marshrýttaryn ashý múmkindigin qarastyrýdy tapsyrdy.

«Osyndaı keshendi sharalardyń arqasynda ǵana Balqash ishki týrızmge, al keleshekte halyqaralyq týrızm úshin tartymdy orynǵa aınalady.

Úkimetke oblys ákimdigimen birlesip osy máselelerdi pysyqtaýdy jáne qalany damytýdyń keshendi jospary aıasynda tıisti is sharalardy kózdeýdi tapsyramyn», - dedi Qasym-Jomart Toqaev.

Sondaı-aq Prezıdent elimizde «Qýatty óńirler – el damýynyń draıveri» atty ulttyq joba júzege asyrylyp jatqanyn eske saldy.

«Ákimdik Úkimetpen birlesip, osy joba aıasynda basqa da shaǵyn qalalarda irgeli bastamalardy qolǵa alýy kerek.

Ekonomıkany ártaraptandyrý isinde Balqash ózgelerge úlgi bola alady. Munda iri ónerkásip oryndarymen qatar týrızm salasyn órkendetýge zor múmkindik bar», - dedi Memleket basshysy.