Prezıdent tapsyrmasy: suıytylǵan gazdyń alty jetkizýshisine qatysty tergeý aıaqtaldy

NUR-SULTAN. QazAqparat – Memleket basshysynyń baspasóz hatshysy Berik Ýálı Prezıdenttiń 2022 jylǵy 5 qańtardaǵy eldegi áleýmettik-ekonomıkalyq ahýal máseleleri jónindegi keńeste bergen tapsyrmasynyń qalaı oryndalǵanyn jazdy, dep habarlaıdy QazAqparat tilshisi.

«Bas prokýratýraǵa Básekelestikti qorǵaý agenttigimen birlesip, baǵalyq sóz baılasý men ózge de básekelestikke qarsy is-áreketterge qatysty tergeý júrgizýdi tapsyramyn», - dep tapsyrma bergen edi Prezıdent Qasym-Jomart Toqaev.

Osylaısha, suıytylǵan munaı gazyn jetkizýshi alty iri kóterme saýda kompanııasyna qatysty tergep-tekserý jumystary aıaqtaldy. Suıytylǵan munaı gazyn satýshylar ústemdik jaǵdaıyn paıdalana otyryp, eń joǵary baǵany belgileýdi kózdegeni anyqtaldy.

«Qazaqoıl Aqtóbe» JShS-ne ákimshilik aıyppul salý týraly sot sheshimi shyǵaryldy (sheshim kúshine engen joq).

«SNPS-Aqtóbemunaıgaz» AQ men «SP Qazgermunaı» JShS-ne qatysty ákimshilik is qozǵaldy jáne sotqa berildi. «Petrosun» JShS men «Qazaq gaz óńdeý zaýyty» JShS-ne qatysty qylmystyq is qozǵalyp, «QazMunaıGaz» UK» AQ-ǵa qatysty is materıaldary Qarjylyq monıtorıng agenttigine berildi. «Qazaq gaz óńdeý zaýyty» JShS is-áreketterinde suıytylǵan munaı gazyn satý kezinde negizsiz qysqartý faktileri anyqtaldy.

Básekelestikti qorǵaý jáne damytý agenttigi suıytylǵan munaı gazyn bólshek saýdada ótkizetin 193 sýbektige qatysty, onyń 89-na Bas prokýratýramen birlesip, tergep-tekserý jumystaryn júrgizip jatyr.

Naryqtaǵy 65 sýbektiniń isinde kelisilgen áreketter jáne karteldik sóz baılasý faktileri anyqtaldy. Al 45 sýbektige qatysty ákimshilik is qozǵalyp, materıaldar sotqa jiberildi. Salynǵan ákimshilik jazalardyń jalpy somasy – 92 mıllıon teńge.