Prezıdent tapsyrmasy: Qazaqstanda sý tazalaý nysany iske qosylady

NUR-SULTAN. QazAqparat - NCOC kompanııasy qorshaǵan ortaǵa shyǵaryndylardy azaıtý úshin jańa sý tazalaý nysanyn iske qospaq, dep habarlaıdy QazAqparat QR Ekologııa mınıstrliginiń Telegram kanalyna silteme jasap.

Mınıstrliktiń habarlaýynsha, mundaı tapsyrmany Memleket basshysy Qasym-Jomart Toqaev bergen. Osyǵan baılanysty mınıstrlik pen kompanııa arasyndaǵy kelisim negizinde nysan qurylysy bastaldy.

Ol iske qosylǵannan keıin munaımen birge keletin sýdyń quramyndaǵy lastaýshy zattar kólemi tómendep, qorshaǵan ortaǵa zııan azaıady. Bul týraly QR Ekologııa, geologııa jáne resýrstar mınıstrligi Ekologııalyq retteý jáne baqylaý komıtetiniń tóraǵasy Zulfuhar Joldasovtyń óńirge sapary barysynda belgili boldy.

Mınıstrlik ókilderi sý tazalaý ǵımaratynyń qurylysymen tanysyp, sarqyndy sýdy tazalaýdyń ekologııalyq tıimdiligi máselesin talqylady.

«Sý tazalaý stantsııasy qurylysyn bastarda tabıǵat qorǵaý qyzmetindegi ozyq tehnologııalardy qoldaný máselesin eskerdik. Atalǵan joba óndiristik te, ekologııalyq ta máselelerdi sheshedi. Tazalanatyn sý kólemin arttyrý arqyly Astrahan-Mańǵyshlaq sý qubyrynan alynatyn sý kólemin 70%-ǵa azaıtamyz jáne býlaný toǵandaryna jiberiletin sý sapasyn jaqsartamyz. Sýdy qosymsha tazalaý arqyly quramyndaǵy metanol, munaı, kúkirtsýtek, temir jáne qatty zattardyń kólemi azaıady»,- dedi North Caspian Operating kompanııasy Bas dırektorynyń orynbasary Ermek Marabaev.

Ekologııalyq retteý jáne baqylaý komıtetiniń tóraǵasy Zulfuhar Sansyzbaevtyń sózinshe, buryn munaıdan qalǵan óndiristik sarqyndy sýdyń quramyndaǵy las zattar kólemi shekti shamadan asyp ketý jaǵdaılary tirkelgen. Jańa joba sol problemany joıýǵa múmkindik beredi.

«Endi zaýytta sýdy tazalaý eki faza boıynsha júrmek: biri - óndiriste, ekinshisi - osy jańa stantsııada. Sý quramyndaǵy metanoldy tazalaý 65%-ǵa, munaı zattary boıynsha 95%-ǵa, kúkirsýtek boıynsha 75%-ǵa azaıtpaq. Sol sebepti bul ekologııalyq turǵydan óte mańyzdy shara. Onyń ústine Astrahan-Mańǵystaý magıstralinen keletin sýdy Atyraý, Mańǵystaý oblystarynyń halqy tutynady. Ony munaı kompanııasyn tutynýdy azaıtsa, sý jergilikti halyqqa jetkilikti bolady»,- dedi komıtet tóraǵasy.

Qazirgi ýaqytta sý tazalaý stantsııasy ornynda negizgi qurylys jumystary bastaldy. Ol 2022 jyldyń jeltoqsanynda aıaqtalyp, nysan 2023 jyldyń basynda paıdalanýǵa beriledi dep kútilýde.