Prezıdent tapsyrmasy: Qaı óńirde turaqty jumyspen qamtý qarqyny joǵary

NUR-SULTAN. QazAqparat – Bıyl el óńirlerinde 430 myńnan astam jańa jumys orny qurylýy tıis. Bul týraly Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

«Jyl basynda ár ákimmen jasalǵan memorandýmdar boıynsha bıyl óńirlerde 431,5 myń jańa jumys orny qurylýy tıis. Bul, «Eńbek» baǵdarlamasy men «Jumyspen qamtý» jol kartasyn eseptemegende. Resmı vedomstvolyq statıstıka boıynsha, jeti aıda 300 myń 207 jumys orny qurylǵan, onyń ishinde 149 myńy - turaqty jumys orny. Bul jerde erekshe nazar aýdaratyny – ol sol qurylǵan jumys oryndarynyń ishinde turaqty qyzmetter», - dedi mınıstr onlaın rejımde ótken Úkimet otyrysynda.

Onyń sózine qaraǵanda,Soltústik Qazaqstan, Mańǵystaý, Qyzylorda oblystarynda turaqty jumys oryndarynyń úlesi 70 paıyzdan artyp otyrsa, Aqmola, Batys Qazaqstan jáne Qaraǵandy oblystarynda kerisinshe, ýaqytsha jumys oryndarynyń úlesi basym bolyp otyr.

Budan buryn habarlanǵandaı, barlyq memlekettik baǵdarlamalar áleýetin eskere otyryp, bıyl 1 mln 220 myń adamdy jumyspen qamtý josparlanǵan.

«Búginde 743 myń adam osy sharalarǵa tartyldy. Onyń ishinde Eńbek baǵdarlamasyna 379 myń adam qatysýǵa nıet bildirdi. Olarǵa kásipkerlikpen aınalysýǵa 5 800 jeńildetilgen nesıe, 17 200 qaıtarymsyz grant berildi», - dedi mınıstr.