Prezıdent tapsyrmasy: Danıal Ahmetov áleýmettik jelilerde tirkeldi
Atap aıtqanda, aımaq basshysynyń Facebook, Twitter jáne Instagram jelilerinde jeke akkaýnttary paıda boldy.
«Áleýmettik jelini paıdalanýshylardyń barlyǵyna óz yqylasymdy bildiremin. Kommýnıkatsııanyń bul túri ár qazaqstandyqtyń ómirine berik kirip, oı almasyp, pikir bildirýdiń tıimdi quralyna aınaldy. Sondyqtan Feısbýk, Instagramm jáne Tvıtterde jeke paraqshamdy ashýdy jón dep taptym. Jańa suxbat alańdary sizdermen óńirdiń ózekti máselelerin talqylap, olardyń jedel sheshilýine mol múmkindik beredi degen oıdamyn», - dedi Danıal Ahmetov áleýmettik jelilerdegi alǵashqy jazbasynda.
Sondaı-aq ShQO ákimi jańa suhbat alańdary óńirdiń ózekti máselelerin talqylaýǵa, olardyń jedel sheshilýine múmkindik beredi degen senimin bildirdi.
Buǵan deıin habarlaǵanymyzdaı, halyqpen Facebook jáne Instagram arqyly baılanysty oblys ortalyǵy Óskemen qalasynyń ákimi Jaqsylyq Omar da ornatty. Sondaı-aq aımaqtaǵy taǵy bir úlken shahardyń basshysy - Semeı ákimi Ermak Sálimovti Facebook-ten tabýǵa bolady.
Eske salaıyq, QR Prezıdenti Qasym-Jomart Toqaev 28 naýryz kúni el óńirleriniń ákimderimen ótken keńeste halyqpen yqpaldastyq formatyn ózgertý úshin olarǵa áleýmettik jelilerde tirkelýdi tapsyrǵan bolatyn.
Prezıdent áleýmettik jelilerde belsendi jumys isteý: messendjerlerde toptar qurýdyń, júrgizilip otyrǵan saıasatty jete túsindirýdiń, jaǵdaıdy basqara bilýdiń mańyzdylyǵyn aıtqan edi.
Memleket basshysynyń eskertýinen soń óńirler basshylary áleýmettik jelilerde jappaı akkaýnttaryn asha bastady.
Foto: www.altaynews.kz