Prezıdent tapsyrmasy: Atyraýda qurylysy toqtaǵan kontsert zalynyń ornyna mádenıet ortalyǵy salynady
Prezıdent bıylǵy qarashada Atyraýǵa kelgen saparynda mádenıet ortalyǵyn salyp, oǵan Qurmanǵazynyń atyn berýdi usynǵan edi.
«Oblystaǵy mádenıet salasyn damytýǵa erekshe nazar aýdarý qajet. Qalada mádenıet oryndarynyń kóbirek bolǵany jón. Men Atyraý qalasynda daryndy jastar úshin mádenıet jáne shyǵarmashylyq ortalyǵyn salýdy tapsyramyn. Ony qazaq kúı óneriniń alyby – Qurmanǵazynyń atymen ataýdy usynamyn», - dedi Prezıdent.
Oblys ákiminiń orynbasary Jasulan Bısembıevtiń aıtýynsha, qurylysy toqtap turǵan kontsert zaly buzylady. Onyń ornyna Qurmanǵazy atyndaǵy óner ortalyǵyn salý kózdelgen.
«Atyraý qalasyndaǵy qurylysy tolyq aıaqtalmaǵan kontsert zaly buzýǵa uıǵarym jasalyp otyr. Nysan tolyq buzylǵan soń onyń ornyna jańa mádenı ortalyq salý jóninde tapsyrma berildi. Osyǵan baılanysty tıisti salanyń jaýapty mamandary usynys daıyndaıdy. Jańa mádenıet jáne shyǵarmashylyq ortalyqtyń jobasy jobalaý-smetalyq qujattama jasaqtalyp, memlekettik saraptamadan ótkennen soń tanystyrylady», -deıdi Jasulan Bısembıev.
Budan buryn Atyraýda qurylysy toqtaǵan kontsert zaly saýda ortalyǵyna aınalýy múmkin ekenin habarlaǵan bolatynbyz.
«Aldaǵy ýaqytta kontsert zaly saýda-oıyn-saýyq ortalyǵy retinde qaıta jańǵyrtylady. Investor jobanyń quny men tehnıkalyq parametrlerin esepteıdi. Al, saýyqtyrý-monsha kesheniniń bastapqy maqsatyn ózgertý ınvestormen kelisilgennen keıin belgili bolady», - degen edi oblystyq qurylys basqarmasy basshysynyń mindetin atqarýshy Zaınolla Mánenov.
Ashyq kózderden alynǵan foto