Prezıdent tapsyrmasy: Almatyda kóterme-taratý ortalyqtary qurylady

ALMATY. QazAqparat - Almatyda kóterme-taratý ortalyqtary qurylady. Bul týraly Óńirlik kommýnıkatsııalar qyzmetinde ótken brıfıngte Almaty qalasy Kásipkerlik jáne ınvestıtsııalar basqarmasy basshysynyń orynbasary Damır Tazabek aıtty, dep habarlaıdy QazAqparat tilshisi.

Eske salsaq, Memleket basshysy Qasym-Jomart Toqaev óziniń Qazaqstan halqyna arnaǵan sońǵy Joldaýynda jergilikti atqarýshy organdarǵa óndirýshilerdiń tizbegi boıynsha baǵalardy baqylaýdy qamtamasyz etýdi tapsyrǵan bolatyn.

«Bıylǵy jyldyń qarasha aıynda Almaty ındýstrııalyq aımaǵynyń mańynda 17 gektar alańda «Ulttyq saýda-taratý jelisi» JShS taratý ortalyǵynyń qurylysyn bastaý josparlanǵan. Paıdalanýǵa 2023 jyldyń basynda berilýi tıis. Jeke ınvestor jobany memlekettik-jekeshelik áriptestik sheńberinde iske asyrady. Bul el boıynsha 24 kóterme-taratý ortalyqtarynan turatyn ulttyq taýar ótkizý júıesin qurý jónindegi jobanyń quramdas bóligi», - dedi Damır Tazabek.

Joba aıasynda ınvestıtsııa somasy 35 mlrd teńge. Bul sýarmaly jerlerde ósiriletin ónim kólemin ulǵaıtýdy qosa alǵanda, jemis-kókónis ónimderi óndirisiniń ósýiniń negizgi faktory bolamaq. Bul rette azyq-túlikti saqtaýdyń, satýdyń jáne bólýdiń jańa tehnologııasy qurylatyn bolady. Kóterme saýda ortalyqtary ónimdi saqtaý men óńdeýden bastap taratý men satýǵa deıin mamandandyrylǵan qyzmetterdi usynady.

Búginde bas merdigermen birge jobanyń jobalyq-smetalyq qujattamasy ázirlendi. Jobanyń tehnıkalyq-ekonomıkalyq negizdemesi memlekettik saraptamadan ótti.