Prezıdent tapsyrmalarynyń zańda kórinis tabýy mańyzdy - Murat Baqtııaruly

NUR-SULTAN. QazAqparat - Búgin el Prezıdentiniń qatysýymen Ulttyq qoǵamdyq senim keńesiniń úshinshi otyrysy ótti. Bul basqosý, negizinen, densaýlyq saqtaý men bilim berý salasynyń máselelerine arnaldy.

Jıynda Memleket basshysy osy atalǵan salalardy odan ári reformalaý boıynsha naqty ustanymdaryn jarııa etti. Keńes músheleri de óz oılaryn ortaǵa salyp, pikirlerimen bólisti.

Ulttyq qoǵamdyq senim keńesi qoǵamdaǵy ózekti máselelerdi ýaqtyly kóterýimen erekshelenip keledi. Bul Prezıdent aıtqan «halyq kúnine qulaq asatyn memleket» tujyrymdamasynyń iske asyp otyrǵanynyń kórinisi. Sebebi, qoǵamdyq máselelerdiń kóshede emes, osyndaı keńeste der kezinde talqylanyp, sheshimderdiń usynylýy óte mańyzdy dep esepteımin.

Prezıdenttiń naqty tapsyrmalary zań normalarynda kórinis tabýy kerek. Sondyqtan bıyl Parlamentke osy atalǵan máselelerdi qamtıtyn birneshe zań jobasy kelip túsýi múmkin. Mysaly, bilim salasyna qatysty, onyń ishinde JOO muǵalimderiniń jalaqysyn, pedagogıkalyq mamandyqtar boıynsha bilim alatyn stýdentterdiń shákirtaqysyn kóterýge baılanysty zańdar ázirlenýi múmkin.

Qazirdiń ózinde Májiliske ǵylym máseleleri boıynsha zańnamalyq aktilerge ózgerister men tolyqtyrýlar engizýdi kózdeıtin zań jobasy kelip tústi. Sondyqtan, Prezıdenttiń kótergen bastamalary men bergen tapsyrmalarynyń zań normalarymen bekitilýi asa mańyzdy.

Murat BAQTIıARULY,

Parlament Senatynyń depýtaty

Foto: turkystan.kz