Prezıdent tapsyrmasy: sharýalardan astyq satyp alý bastalady

<p>ASTANA. KAZINFORM &mdash; Úkimet rezervinen bólingen qarajat esebinen 150 myń tonna astyq satyp alý qarastyrylyp otyr. Bul týraly Parlament Májilisinde bıylǵy astyqty ótkizý máselesin talqylaý kezinde QR Aýyl sharýashylyǵy mınıstri Aıdarbek Saparov málim etti.</p>

«Aýyl sharýashylyǵy qyzmetkerleriniń birinshi forýmynda Memleket basshysy naryqtaǵy baǵany ustap turý úshin Azyq-túlik korporatsııasy arqyly sharýalardan astyq satyp alýdy tapsyrdy. Osy tapsyrmany oryndaý maqsatynda búgin korporatsııa astyqty satyp alý baǵasyn jarııalaıdy. Úkimet rezervinen osy baǵytta 10 mlrd teńge bólý josparlanǵan. Bul qarajattyń esebinen 150 myń tonna satyp alý qarastyrylyp otyr», - dedi A. Saparov.

Foto: Vıktor Fedıýnın/ Kazinform

Onyń aıtýynsha, taǵy da astyq satyp alý úshin qarajat bólý máselesi erteń Úkimette qaralady. 
Sonymen qatar Májilis depýtattary astyq satyp alý baǵasynyń quldyraýyna baılanysty jaǵdaıdy qalpyna keltirý úshin ne istelip jatqanyn surady.
Óz kezeginde mınıstr bul jumystarǵa da Azyq-túlik korporatsııasy qatysatynyn aıtty.

«Olar ózderi talqylaǵan iri kelisimsharttardy oryndaý úshin qazirdiń ózinde fermerlerden astyq partııalaryn jınastyryp jatyr. Qazir quny 20 mln dollar bolatyn 5 eksporttyq kelisimshart jasalǵan. Astyqty tasymaldaý shyǵyndaryn sýbsıdııalaý erejeleri taıaýda qabyldanady. Sýbsıdııalaýdyń bul túri Qara teńiz, Baltyq, Ońtústik Shyǵys Azııa jáne basqa da porttarǵa astyqty tasymaldaý qunyn tómendetedi. Bul turǵyda bizdiń astyq Eýropa, Afrıka, Kavkaz jáne basqa da perspektıvaly naryqtarda básekege qabiletti bolady. Erejeler jaqyn arada qabyldanady. Barlyq mınıstrlikter kelisti. Osy aptada biz bul máselelerdi sheshemiz», - dedi vedomstvo basshysy.

Eske salsaq, jaqynda Prezıdent Úkimetke Azyq-túlik korporatsııasy arqyly sharýalardan astyq satyp alýdy tapsyrdy.