Prezıdent tapsyrmasy: Buqtyrma sý qoımasynda tehnıkalyq kópirdiń qurylysy aıaqtaldy

<p>Búgin Buqtyrma sý qoımasy arqyly ótetin tehnıkalyq kópirdiń qurylysy aıaqtaldy. Ol tehnıka, jabdyqtar men mamandardy jumys ornyna úzdiksiz jáne jedel jetkizýge múmkindik beredi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Tehnıkalyq kópirdiń uzyndyǵy - 1 153 metr. Onda 13 qurylys alańy bar.

Shyǵys Qazaqstan oblysynyń ákimi Ermek Kósherbaev kópirge baryp, qurylys jumystarynyń barysymen tanysty. 

Foto: ShQO ákiminiń baspasóz qyzmetinen

«Kópir Memleket basshysynyń tapsyrmasy boıynsha salynyp jatyr. Ol logıstıkany, týrızmdi, shaǵyn jáne orta bıznesti damytýǵa sep bolady. Qazirdiń ózinde munda jaqyn mańdaǵy aýyldardyń turǵyndary jumys istep, jańa jumys oryndary ashylyp jatyr. Kópirdiń bárimiz úshin, birinshi kezekte shalǵaıdaǵy shekaralas aýdandarymyz Kúrshim, Zaısan jáne Tarbaǵataı aýdandarynyń turǵyndary úshin mańyzy zor. Bul strategııalyq jobany 2024 jyly laıyqty aıaqtaıtynymyzǵa senimdimin», - dedi Ermek Kósherbaev.

Foto: ShQO ákiminiń baspasóz qyzmetinen

Ekijolaqty avtomobıl kópiri Kúrshim aýdanynyń Quıǵan aýylyndaǵy Buqtyrma sý qoımasynyń eni eń kishi ýchaskesinde salynyp jatyr. Bul Qazaqstandaǵy eń uzyn kópir bolmaq. 

18 tirektiń on ekisi ornatylyp, altaýy boıynsha jumystar júrgizilýde. Budan basqa, kirme joldar, sý ótkizý qurylystary men aınalma joldar retke keltirilip jatyr.

«Buǵan deıin kezek kútý ýaqytyn eseptemegende, sý qoımasy arqyly parommen ótetin ýaqyt 40 mınýtqa sozylsa jáne parommen árbir júrip ótkeni úshin kóp aqsha tóleýge týra kelse, endi qurylys aıaqtalǵannan keıin sý qoımasyn eki mınýtta ǵana kesip ótýge bolady», - deıdi Shyǵys Qazaqstan oblysynyń ákimi.