Prezıdent Taldyqorǵanda jańadan ashylǵan ǵımarattardy aralady

TALDYQORǴAN. QazAqparat - Memleket basshysy Nursultan Nazarbaev jumys sapary barysynda Taldyqorǵanda byltyr paıdalanýǵa berilgen kórme kesheni men Saltanat saraıynda boldy. Bul jerde Prezıdent kásipkerlermen júzdesti, dep habarlaıdy QazAqparat tilshisi.

Elbasyna «Atameken Business Citý» ǵımaratynyń tujyrymdamasy tanystyryldy. ShaHardyń ońtústik-batys bóliginde ornalasqan kórme kesheninde Almaty oblysynyń kásipkerler palatasynyń keńsesi ornalasqan. Atalǵan nysanda open space formatynda Óńirlik kásipkerler palatasy, sonymen qatar «bir tereze» qaǵıdaty boıynsha qyzmet kórsetip otyrǵan Kásipkerlerge qyzmet kórsetý ortalyǵy jáne bıznes-ınkýbator jumys isteıdi. Kezdesý barysynda Prezıdent aldynda jetisýlyq kásipker Rımma Salyqova sóz sóılep, bıznes ókilderine jasalyp otyrǵan qamqorlyǵy úshin zor alǵysyn bildirdi.

«Biz Almaty oblysynyń kásipkerlerimiz. Memleket tarapynan jasalyp otyrǵan zor kómek úshin alǵysymdy bildirgim keledi. Myna jańa ortalyqta kásipkerler úshin barlyq qyzmet túri qarastyrylǵan. Ary-beri sandalyp júrmeımiz. Ýaqyt únemdeý jaǵynan da tıimdi», - dedi R.Salyqova.

«Almaty oblysy eshbir óńirge uqsamaıtyn, biregeı aımaq. Birinshiden, taýy, dalasy men ózenderi jarasqan elimizdiń eń kórikti jerleriniń biri. Ekinshiden, munda ónerkásip pen ekonomıka da jaqsy damyǵan. Úshinshiden, bul shekaralyq oblys (...) Sońǵy úsh jylda bul óńir jaqsy damyp keledi. Ákim jáne qyzmetkerleri jan-jaqty tıimdi qyzmet atqarýda. Qant qyzylshasyn ósirý oblysta qashanda basymdyqqa ıe bolatyn. Qazirgi tańda jańa qant zaýyttary iske qosylǵan. Múmkindikter bar. Oblys ákiminiń sońǵy úsh jylda atqarǵan jumystaryna oń baǵa beremin», - dedi Nursultan Nazarbaev.

Óz kezeginde Amaty oblysy kásipkerler palatasynyń dırektory Narıman Ábilshaıyqov Memleket basshysyn kásipkerler quqyǵyn qorǵaý, qarjylaı emes qoldaý kórsetý, aýyl sharýalaryn shoǵyrlandyrý, jobalardy qarjylandyrýǵa kómektesý boıynsha atqarylǵan jumys nátıjesimen  tanystyrdy.

«Bıyl «Bastaý» boıynsha oqytý oblystyń barlyq aýdandary men qalalarynda júrgiziledi. Byltyr joba aıasynda 1 312 adam oqysa, bıyl 3 myńnan astam adam qamtylady dep josparlanǵan. Shaǵyn nesıeleýge qosymsha 20 mlrd teńge bólindi, osy múmkindik arqyly bıyl joba sanyn 650-ge deıin ulǵaıtyp, qarjylandyrý kólemin arttyrýdy josparlap otyrmyz», - dedi Narıman Ábilshaıyqov.

Kezdesý sońynda Memleket basshysy jumys saparyn qorytyndylap, 5 áleýmettik bastamany júzege asyrýǵa nazar aýdarýdy tapsyrdy.