Prezıdent: Tabysyn elimen bólisken azamattar joǵary qurmetke laıyq

<p>&laquo;Qazaqstanda jasalǵan&raquo; degen tańba eń myqty sapanyń, eń jaqsy ónimniń belgisine aınalýǵa tıis. Bul týraly &laquo;Altyn Sapa&raquo; jáne &laquo;Paryz&raquo; syılyqtarynyń ıegerlerin marapattaý rásiminde Prezıdent Qasym-Jomart Toqaev aıtty, dep habarlaıdy <a href="Kazinform" target="_blank" rel="noopener">Kazinform</a>.</p>

«Eski súrleýge túsip ketpeı, progress jolynan aýytqymaýymyz qajet. Bizge uzaq merzimdi maqsattarymyzdy aıqyndap alý kerek. Erteń kim bolatynymyz, myń qubylǵan álemde qandaı oryn alatynymyz áste esten shyqpaýǵa tıis. Bir sózben aıtqanda, biz tek alǵa umtylýymyz kerek. Biz jasampaz ári jańashyl bolýǵa tıispiz. Elimizdiń alǵa qoıǵan naqty mejesi bar. Myzǵymas birlik pen qajyrly eńbektiń arqasynda óz maqsatymyzǵa jetemiz. Biz úırenetin ǵana emes, úıretetin ult bolýymyz kerek. Tutynatyn emes, óndiretin memleket bolýymyz qajet. Men bul týraly únemi aıtyp júrmin. «Qazaqstanda jasalǵan» degen tańba eń myqty sapanyń, eń jaqsy ónimniń belgisine aınalýǵa tıis. «Altyn sapa» baıqaýynyń basty maqsaty – osy», - dedi Prezıdent.

Sonymen birge, Memleket basshysy bıznes ókilderi halyq aldyndaǵy jaýapkershilikti tereń sezinýi kerektigin basa aıtty.

«Adal azamat óz jaǵdaıyn ǵana jasamaıdy. Ol týǵan aýylynyń nemese ózi jumys istep jatqan aımaqtyń qamyn da oılaıdy. Mundaı kásipkerler kópshiliktiń qoldaýyna jáne alǵysyna ıe bolady. Shyn máninde, týǵan eldiń yqylasynan artyq marapat joq. «Paryz» baıqaýyna qatysýshylar bıyl túrli áleýmettik jobaǵa belsene atsalysty. Qaıyrymdylyqqa 80 mıllıard teńgege jýyq qarjy jumsady. 6 myńnan astam jańa jumys ornyn ashty. Tabysyn elimen bólisken osyndaı azamattar joǵary qurmetke laıyq», - degen Qasym-Jomart Toqaev «Altyn sapa» jáne «Paryz» baıqaýyna qatysqan kásipkerlerge rızashylyǵyn bildirdi.