Prezıdent syrtqy ister salasyndaǵy mamandar turaqsyzdyǵyna alańdaýshylyq bildirdi

NUR-SULTAN. QazAqparat – QR Prezıdenti Qasym-Jomart Toqaev Syrtqy ister mınıstrliginiń keńeıtilgen alqa májilisinde saladaǵy bilikti mamandardyń vedomstvodan ketýine alańdaýshylyq bildirdi, dep habarlaıdy QazAqparat tilshisi.

«Besinshi másele – Qazaqstan dıplomatııasynyń jańa kelbetin qalyptastyrý. Bizdiń dıplomatııalyq qyzmetke tyń serpilis qajet. Bilikti mamandardyń Syrtqy ister mınıstrliginen ketýi onyń kadrlyq áleýetin álsiretýde. Bul – shyn máninde, ózekti másele.

Men osy mınıstrlik eń konservatıvti qurylymnyń biri ekenin bilemin. Munyń jaqsy jaǵy da bar. Dástúr saqtalady, kásibı dıplomattar shoǵyry qalyptasady. Degenmen, jaǵymsyz jaǵy da joq emes», - degen Prezıdent bilimdi, bilikti ári elge adal qyzmet etkisi keletin jastar úshin mınıstrlikke jumysqa turý – «alynbas qamaldaı» ekenin atady.

Aıtýynsha, ahýaldy túzep, kadr saıasatyn túbegeıli qaıta qaraıtyn kez keldi.

«Dıplomatııalyq qyzmetke, eń aldymen, kózi ashyq, kókiregi oıaý, otanshyl mamandar qajet. Qazaqstan atynan shet memleketterde qyzmet istep júrgen dıplomattarymyz shetel tilderin ǵana emes, aldymen memlekettik tildi bilýi kerek.

Sóz sońynda taǵy da qaıtalap aıtamyn: Qazaqstannyń syrtqy saıasatyndaǵy negizgi baǵyttardy júzege asyrý úshin tıisti jumysty tyń qarqynmen jalǵastyrý kerek. ıAǵnı, ýaqyt synynan ótken ustanymdardy jańa sheshimdermen ushtastyrý qajet. Osy oraıda, dıplomattarymyz qashanda el múddesine adal bolady dep senemin», - dedi Memleket basshysy.