Prezıdent suhbatynda Qańtar oqıǵasy týraly buryn bolmaǵan jaıttar aıtyldy – Depýtat
Depýtat Prezıdent Qańtar oqıǵasyna qatysty da buryn-sońdy aıtylmaǵan jańa túıindemelerdi ashyp aıtqanyn jetkizdi.
«Qańtar qasiretine de eki jyl tolyp otyr. Ýaqyt zymyrap ótip jatyr, biraq sol kezdegi halyqtyń júregine túsken syzat áli syzdap tur, jazylar emes. Árıne ol 1-2 jylda jazylatyn da nárse emes. Biz sol qańtarda egemendigimiz ǵana emes, eldigimizden aıyrylyp qala jazdadyq. Shetti aıtpaǵanda ózimizdiń aramyzda da túrli saıagóıler túrli pikir taratyp, halyqtyń sanasyn sarsańǵa saldy. Dál osy kezdegi qosarlanǵan bıliktiń ekiushtylyǵy da kúmán qııalynda otyrǵan halyqtyń senimsizdigin tereńdete tústi. Burynǵy bıliktiń qudiretinen aıyrylyp qalǵysy kelmeýi jáne jańa bıliktiń jasap jatqan jańa reformalaryn qabyldamaý pıǵyly alańsyz otyrǵan halyqty aqyry dúrbeleńge saldy. Osyndaı syndarly ýaqytta Memleket basshysy Qasym-Jomart Toqaevtyń tabandylyǵy men qaıratty minezi, batyl sheshimderi, aıtqan ornyqty sózderi, salıqaly saıasaty, jasaǵan qadamdary, bar jaýapkershilikti óz moınyna ala bilýi, abdyrap otyrǵan eldiń esin jıǵyzdy, kúmánin seıiltti, úmitin oıatty. Bolmysynan ulttyq sana-sezimi bıik, el múddesine qater tóngen kezderde quryshtaı uıysa alatyn, aq-qarany ajyrata biletin halqymyz Prezıdentimizdiń aınalasyna birigip, kók týymyzdyń astyna jınalyp, qaısarlyǵyn tanytty. Eldik pen egemendikti tańdady», - dep jazdy Á.Bektaev áleýmettik jelidegi paraqshasynda.
Depýtat Prezıdent sol qańtar qasiretinen keıingi eki jylda eldiń bolashaqqa degen senimin nyǵaıta túsý úshin, ekonomıkamyz turalap turyp qalmaýy úshin eńbek etip kele jatqanyn atap ótti.
«Álemniń jartysyn sharlap, áıgili ınvestorlarmen kezdesip, memleketimizdiń ishki de syrtqy jaǵdaıynyń turaqty ekendigin dáleldeý úshin kúsh-jigerin aıamaı kele jatyr. Óziniń halqynyń aldynda, basym daýyspen zańdy saılanǵan Prezıdent retinde qashanda shynaıylyǵynan tanǵan emes. Búgingi suhbat ta sonyń dáleli. El kókeıinde júrgen suraqtarǵa jaýap bere otyryp, Prezıdentimiz bizdiń Memleketimizdiń bolashaǵyna qatysty senimdi jáne naqty qadamdardyń jasalǵanyn, olardyń saıası, ekonomıkalyq, zańnamalyq negizderiniń tolyq qalyptasqanyn jáne el ekonomıkasynyń serpindi damýyna barlyq alǵysharttyń bar ekenin ashyp aıtty. Ol úshin elimizdiń tutastyǵy, oǵan negiz bolatyn halqymyzdyń yntymaǵy men birliginiń asa mańyzdylyǵyn basa aıtty. Shynynda da, Táýelsizdik – basymyzdaǵy baq. Ony aıalaı bilý – bárimizdiń mindetimiz», - dedi Á.Bektaev.