Prezıdent: Sońǵy jyldary báriniń de zańger men ekonomıst bolǵysy keledi

ASTANA. QazAqparat - Qazaqstan Prezıdenti Nursultan Nazarbaev Bes áleýmettik bastama boıynsha stýdent jastarǵa grant bólýde nelikten tehnıkalyq mamandyqtarǵa mańyz beriletinin aıtty, dep habarlaıdy QazAqparat tilshisi.

«Úshinshi bastama - joǵary bilim alýdyń sapasyna qatysty bolyp otyr. Biz granttardyń sanyn arttyryp jatyrmyz. Bul rette, ásirese tehnıkalyq mamandyqtarǵa basa mańyz beriledi. Bizde bul jerde defıtsıt bar. Biz jańa kásiporyndardy engizip, ındýstrııalandyrýdy júzege asyrýdy qolǵa aldyq. Al ol jerde bizge kadrlar kerek. Sońǵy jyldary bári de zańger men ekonomıst bolǵysy keledi. Olar bizde jetkilikti. Bizdegi bilim júıesi jyldan jylǵa sapaly túrde ósip keledi. Sondyqtan Qazaqstannyń abıtýrıentteri dál qazaqstandyq joǵary oqý oryndaryn tańdaýy da logıkalyq turǵydan durys», - dedi Prezıdent elordadaǵy Beıbitshilik jáne kelisim saraıynda ótken Qazaqstan halqy Assambleıasynyń XXVІ sessııasynda.

Sonymen birge, Memleket basshysy stýdentterdiń jataqhana máselesin sheshý de mańyzdy ekenin alǵa tartty.

«Olar (jataqhanalar - avt.) túnep shyǵatyn ǵana oryn emes, turýǵa tolyǵymen turarlyq orynǵa aınalýy kerek. Meniń oıymsha, osy qadam arqyly biz stýdent jastarǵa úlken kómek kórsetetin bolamyz. Bul olardyń durys oqýyna jáne bolashaǵyna kerek», - dedi Prezıdent.

Aıta ketsek, elordadaǵy Beıbitshilik jáne kelisim saraıynda Elbasy Nursultan Nazarbaevtyń tóraǵalyǵymen Qazaqstan halqy Assambleıasynyń XXVІ sessııasy ótti.