Prezıdent syılyǵy: Qaraǵandy oblysyndaǵy Oqýshylar saraıy men mádenıet úıine jańa avtobýstar berildi
Bul kólikter Saran qalasyndaǵy QazTehna zaýytynda shyǵarylǵan.
– Memleket basshysy biz úshin tosyn syı jasady. Biz bul kólikpen konkýrstarǵa, kontsertterge, ekskýrsııalarǵa jáne basqa da is-sharalarǵa baramyz. Oqýshylar saraıy Prıshahtınsk yqshamaýdanynda ornalasqan. Ózimizdiń kóligimiz bolmaǵandyqtan, balalarmen qala ortalyǵyna barý qıyn edi. Kólik bizge asa qajet edi. Sondyqtan bul biz úshin óte baǵaly ári qajet syılyq. Biz óte rızamyz, – dedi «Káýsar» oqýshylar saraıynyń dırektory Áıgerim Isbekova.
Nura aýdany Shahter aýylynyń mádenıet úıinde de buryn-sońdy óz avtobýsy bolǵan joq. Sondyqtan Prezıdenttiń tartýy olardyń da muqtajyn ótedi.
– Endi biz osy kólikpen konkýrstarǵa alańsyz bara alamyz. Qýanyshtymyz. Aýylymyzdyń mádenıet úıinde jeti kórkem ónerpazdar ujymy jumys isteıdi Júzge jýyq jastar men jasóspirimder shyǵarmashylyqpen aınalysady, – dedi Nura aýdany mádenıet úıiniń dırektory Ádilbek Qumar. – Sonymen qatar Shahter aýylynda dene shynyqtyrý-saýyqtyrý kesheni bar. Bul avtobýsty jarysqa baratyn sportshylarymyz da paıdalanady.
Esterińizge sala keteıik, Memleket basshysy 14 tamyzda Qaraǵandy oblysyna jumys saparymen barǵan bolatyn. Sapar barysynda ol óńirdegi ónerkásip jáne ındýstrııalyq kásiporyndardyń, áleýmettik nysandardyń qyzmetimen tanysty. Atap aıtqanda, Qasym-Jomart Toqaev Prıshahtınsk yqsham aýdanynda jańadan ashylǵan Oqýshylar saraıyn, sondaı-aq Nura aýdany Shahter aýylyndaǵy jaqynda ǵana jóndeýden ótken Mádenıeti úıi men Dene shynyqtyrý-saýyqtyrý keshenin aralap kórdi.