Prezıdent Shymkent munaı óńdeý zaýyty ónimi jylyna 12 mln tonnaǵa deıin kóbeıetinin aıtty

SIANЬ. QazAqparat - Qazaqstan munaı eksportyn kóbeıtýge múddeli. Bul pikirdi QR Prezıdenti Qasym-Jomart Toqaev birinshi «Ortalyq Azııa – Qytaı» sammıtinde aıtty, dep habarlaıdy QazAqparat.

«Besinshi, energetıka salasyndaǵy, onyń ishinde, munaı-gaz sektoryndaǵy qarym-qatynasty damytýǵa mol múmkindik bar. Biz munaı eksportyn kóbeıtýge múddelimiz. Sol úshin «Qazaqstan – Qytaı» munaı qubyrynyń tasymal múmkindigin arttyrýdy josparlap otyrmyz. Kún tártibinde qoldanystaǵy «Atyraý – Keńqııaq», «Keńqııaq – Qumkól» munaı qubyrlarynyń ótkizý múmkindigin arttyrý máselesi tur.

Qazir munaı ónimderin tutyný kólemi udaıy ósip keledi. Sondyqtan, Shymkent munaı óńdeý zaýytynan shyǵatyn ónim kólemin jylyna 6-dan 12 mıllıon tonnaǵa deıin kóbeıtýdi kózdep otyrmyz. Gaz óńdeý qýatyn arttyrý jáne gaz tasymaldaý júıesin jetildirý Qazaqstan úshin basym baǵyt sanalady«, - dedi Qasym-Jomart Toqaev.

Ol Qazaqstan úshin «Beıneý – Bozoı – Shymkent» magıstraldi gaz qubyrynyń ekinshi tarmaǵyn salý óte mańyzdy ekenin alǵa tartty. Qashaǵan kenishinde jylyna 4 mıllıard tekshe metr gaz óńdeıtin zaýyt qurylysyna da basa mán berilmek.

»Qytaılyq dostarymyz aımaqtaǵy osy mańyzdy jobalarǵa qoldaý kórsetýdi jalǵastyrady dep senemiz», - dedi QR Prezıdenti.