Prezıdent shetel jumys kúshi tartylǵan kásiporyndarǵa qatysty pikir bildirdi
«Men sheteldik jumys berýshiler tarapynan bizdiń azamattardy kemsitýine jol berilmeýi kerektigi týrasynda udaıy aıtyp kelemin. Sizder de bul máseleni kótergensizder. Sondyqtan meniń tapsyrmammen ótken aıda sheteldik jumys kúshin tartyp otyrǵan kásiporyndarda eńbek jáne kóshi-qon zańnamasynyń saqtalýy boıynsha tekserý júrgizildi. Osy ýaqytta 95 kompanııa ınspektsııalyq tekserýden ótip, 930 zańbuzýshylyq faktileri anyqtaldy», - dedi Memleket basshysy Ulttyq qoǵamdyq senim keńesiniń otyrysynda.
Osy oraıda sheteldik qyzmetkerlerdiń jumysy berilgen ruqsatnamaǵa sáıkes kelmeýi, atqaryp otyrǵan laýazymy men biliminiń sáıkessizdigi jıi kezdesken.
«Jaǵdaıdy taldaý men quzyretti organdardyń tekserýi negizinde jáne Ulttyq keńes músheleriniń usynystaryn eskere otyryp, Eńbek jáne halyqty áleýmettik qorǵaý mınıstrligi birqatar ózgeristerdi ázirledi», - dedi Prezıdent.
Birinshiden, 2020 jylǵa sheteldik jumys kúshin tartý kvotasy aıtarlyqtaı qysqarady. Qysqartý 40 paıyz shamasynda bolady. 2019 jyly 49 myń bolsa, 2020 jyly 29 myń bolady.
Ekinshiden, jumysshylar sany 250 adamnan asatyn, 30-dan artyq sheteldik jumysshy tartqan barlyq kásiporyndar turaqty tekserýmen qamtylady. Endi Eńbek mınıstrligi kez kelgen zańbuzýshylyqtarǵa jedel áreket ete alady. Osylaısha, máseleniń jyldan-jylǵa qordalanýyna jol berilmeıdi.
«Úshinshiden, sheteldik jumys kúshine kvota taǵaıyndaý erejesi jáne ruqsat berý erejesi qaıta qaralady. Tórtinshi sanattaǵy jumysshy mamandyǵy boıynsha sheteldik jumysshynyń sanyn qysqartý máselesi de qaıta qaralady. Sondaı-aq, mamandardyń jergilikti quramyna qatysty talaptar kúsheıtiledi», - dedi QasymJomart Toqaev.