Prezıdent sheshimi Almaty bıýdjetiniń kirisin 20 paıyzǵa arttyrdy
Ortalyq kommýnıkatsııalar qyzmetinde ótken brıfıngide Almaty qalasynyń ákimine Baqytjan Saǵyntaevqa pandemııanyń ekonomıkalyq saldaryn joıý baǵytyndaǵy jumystar týraly saýal qoıyldy.
«Eń úlken kómek Prezıdentimizdiń qabyldaǵan shaǵyn jáne orta kásipkerlikten túsetin koroparatıvtik salyqty jergilikti qazynada qaldyrý týraly sheshimi boldy. Sonyń ózi ǵana jalpy ekonomıkamyzdyń túsimine 20 protsent ósim berdi. Almaty shaǵyn jáne orta bıznestiń qalasy bolǵandyqtan, neǵurlym osy saladan salyq kóp tússe, jergilikti bılik soǵurlym kásipkerlikti damytýǵa múddeli. Óıtkeni salyqtyń bári ózinde qalyp otyr», -dedi ákim.
Onyń sózinshe, atalǵan sheshimniń arqasynda byltyr Almaty qalasynyń bıýdjetine túsken kiristiń kólemi birinshi ret 1 trln teńgelik kórsetkishke jetken.
«Al bıyl 10 aıdyń qorytyndysy boıynsha bizdiń ekonomıkalyq ósimimiz 5,5 paıyzǵa artyp otyr. Qalanyń 2050 jylǵa deıingi damý strategııasy boıynsha álemdegi básekege qabiletti 100 qalanyń sanatyna kirý úshin jyl saıynǵy ekonomıkalyq ósim 5 paıyzdan kem bolmaýy kerek. Bıyl ol 5,5 paıyz boldy», -dedi Baqytjan Saǵyntaev.