Prezıdent sheneýnikterge bıýrokratııamen aınalyspaýdy eskertti

NUR-SULTAN. QazAqparat - Jaýapkershilikten qashyp, bıýrokratııamen aınalysýǵa bolmaıdy. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi Aqorda baspasóz qyzmetiniń Twitter-degi paraqshasyna silteme jasap.

«Pandemııamen kúres barlyq kúshti, bastamashylyqty, ózińe jaýapkershilik qabyldaý men kóshbasshylyqty jumsaýdy talap etedi. Tótenshe jaǵdaı rejımi aıasynda bıýdjetteý, memlekettik satyp alý salasyndaǵy bıýrokratııalyq protsedýralardy jeńildetý boıynsha jedel qabyldanǵan sharalar óz nátıjesin berdi», - dedi Qasym-Jomart Toqaev.

Memleket basshysynyń atap ótýinshe, standartty protsedýra tártibi tynysh ýaqytqa eseptelingen.

«Qazir biz soǵysta júrmiz. Sondyqtan árbir basshydan jedel máseleler men tapsyrmalardy sheshýde barymsha tıimdilik talap etiledi. Jaýapkershilikten qashyp, bıýrokratııamen aınalysýǵa bolmaıdy», - dedi QR Prezıdenti.

Aıta keteıik, vıdeobaılanys arqyly ótip jatqan jıynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomıkalyq damý qorytyndysy týraly esep berdi. Sondaı-aq koronavırýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boıynsha bergen tapsyrmalary men mindetteri qarastyryldy.

Elimizdiń áleýmettik-ekonomıkalyq damýynyń qorytyndylary men jyl sońyna deıin oryndaıtyn mindetter jóninde Premer-Mınıstr Asqar Mamın, aqsha-nesıe saıasatyna qatysty sharalar týraly Ulttyq banktiń tóraǵasy Erbolat Dosaev, elimizdegi epıdemıologııalyq ahýaldy jaqsartý jónindegi sharalar týraly Densaýlyq saqtaý mınıstri Alekseı Tsoı baıandama jasady.