Prezıdent sheneýnikterdi jıyndardyń kóbin onlaın formatta ótkizýge shaqyrdy

NUR-SULTAN. QazAqparat – Memlekettik apparatty bıýrokratsyzdandyrý isimen eki birdeı agenttik aınalysatyn boldy, dep habarlaıdy QazAqparat tilshisi.

Bul týraly memleket basshysy Qasym-Jomart Toqaev Parlament Májilisiniń otyrysynda málim etti.

«Jıyndardyń kóbin onlaın formatta ótkizý kerek. Memlekettik apparatty bıýrokratsyzdandyrýdyń osy jáne ózge de sharalary jeke Jarlyqta kórinis tabady», -degen Qasym-Jomart Toqaev qos birdeı agentiktiń fýnktsıonalyna jańa mindetter júkteý kerektigin atady.

«Strategııalyq josparlaý jáne reformalar jónindegi agenttiginiń, Memlekettik qyzmet isteri jónindegi agenttiktiń fýnktsıonaldarynda memlekettik apparattyń tıimdiligin arttyrý jáne bıýrokratsyzdandyrý sharalaryn iske asyrý men monıtorıngileýdiń naqty fýnktsııalaryn qarastyrý qajet», - dedi Memleket basshysy.

Prezıdenttiń paıymynsha, Memorgandardyń aqparattyq júıelerin resmı resýrs dep taný kerek.

«Formasy boıynsha úlgili, biraq mazmuny boıynsha qatty suryptalǵan qujattar ázirlenip jatyr. Negizgi ıntegratsııalyq júıelerdiń bar bolǵanyna qaramastan, memorgandar makýlatýrany qaptatyp, mánsiz hat almasýyn qoıar emes. Memlekettik organdardyń atalmysh aqparattyq júıelerin qaǵazben dáleldeýdi qajet etpeıtin resmı resýrs dep taný kerek. Olaı bolmasa, tsıfrlandyrýdy ne úshin engizip jatyrmyz?

Tsıfrlandyrý sándi oıynshyq emes qoı. Ol memlekettik apparat fýnktsııasyna qoldaý turǵysynan paıdaly bolýy qajet», - dedi Memleket basshysy.