Prezıdent shahmat sportyn baqylaıtyny qýantady - Bıbisara Asaýbaeva

ASTANA. QazAqparat – Blıts-shahmattan álem chempıony Bıbisara Asaýbaeva Jibek Joly telearnasyna bergen suhbatynda Memleket basshysynyń qabyldaýynan keıingi áserimen bólisti, dep habarlaıdy QazAqparat tilshisi.

«Memleket basshysymen kezdesý óte jyly atmosferada ótti. Qasym-Jomart Kemelulynyń shahmatty baqylap, bizdi qoldaıtyny qýantady», – dedi Bıbisara Asaýbaeva efır kezinde.

Onyń aıtýynsha, Prezıdent jas chempıondy kezekti jeńisimen quttyqtap, jetken jetistiktermen toqtap qalmaı, odan ári bıik shyńdardy baǵyndyra túsýge keńes bergen.

Keshe habarlaǵanymyzdaı Memleket basshysy Qasym-Jomart Toqaev qazaqstandyq shahmatshy, blıtsten álem chempıony Bıbisara Asaýbaevany jeke qabyldap, jeńisimen quttyqtady.

B.Asaýbaeva ótken jyly jeltoqsanda blıtsten álem chempıon atanǵan edi.

Odan bólek, jýyrda ǵana jerlesimiz Máskeýde ótken «Shahmat juldyzdary» atty halyqaralyq týrnırde blıtsten áıgili grossmeıster Sergeı Karıakındi jeńdi.

Foto: instagram.com/kzchessfederation