Prezıdent Sergeı Tereşenkonyń otbasyna kóńil aıtý jedelhatyn joldady

ASTANA. QazAqparat - Qasym-Jomart Toqaev kórnekti memleket jáne qoǵam qaıratkeri Sergeı Tereşenkonyń qaıtys bolýyna baılanysty onyń otbasy men jaqyndaryna kóńil aıtty, dep habarlaıdy QazAqparat Aqordanyń resmı saıtyna silteme jasap.

– Sergeı Aleksandrovıch eńbek jolynda kolhoz ınjenerinen bastap Qazaqstan Respýblıkasy Úkimetiniń birinshi tóraǵasyna deıingi kásibı belesterden ótti. Onyń basshylyǵymen Qazaqstan táýelsizdik alǵan jyldary aýqymdy áleýmettik-ekonomıkalyq reformalar ázirlenip, júzege asyryldy. Belsendi qoǵam qaıratkeri jáne kásipker retinde S.Tereşenko elimizdiń damýyna, beıbitshilik pen kelisimdi nyǵaıtýǵa ólsheýsiz úles qosty. Erekshe sińirgen eńbegi úshin «Qazaqstannyń Eńbek Eri» joǵary ataǵymen, basqa da memlekettik nagradalarmen marapattaldy, – delingen jedelhatta.

Osyǵan deıin Qazaqstannyń birinshi Premer-Mınıstri Sergeı Tereşenko ómirden ozǵany habarlandy.