Prezıdent «senim joǵaltqan» saıası qyzmetshilerdi jumystan shyǵara alady – zań jobasy
«Ótken jyly agenttik memlekettik qyzmetti jetildirý jóninde zań jobasyn ázirlep, Parlamenttiń qaraýyna engizdi. Zań jobasynda mynadaı ózgerister qarastyrylǵan. Birinshiden, Prezıdent sheshimimen saıası qyzmetshilerdi «senim joǵaltýyna» baılanysty jumystan shyǵarý múmkindigi engiziledi. Mundaı sebeppen shyǵarylǵan qyzmetshi memlekettik qyzmetke úsh jyl boıy qaıtyp kele almaıtyn bolady. Ekinshiden, ózge óńirge rotatsııalanǵan qyzmetshige úı jaldaýǵa tólem engiziledi. Bul qyzmetshilerdi óńirlerge rotatsııalanýǵa yntalandyrady», - dedi ol agenttiktiń keńeıtilgen alqa otyrysynda.
Onyń atap ótýinshe, úshinshiden, memlekettik organdarǵa naqty bir jobany atqarý úshin ýaqytsha kelisimshart boıynsha qyzmetke alýǵa múmkindik beriledi. Mundaı qyzmetkerler memlekettik laýazymdardy atqarmaıdy jáne belgilengen ýaqytqa ǵana alynatyn bolady. Bul jańashyldyq Memlekettik basqarýdy damytý tujyrymdamasyna saı engizilýde.
«Tórtinshiden, memlekettik qyzmetshilerdiń jumys ýaqyty rejıminiń saqtalýy retteletin bolady. Memlekettik organdardyń jumys ýaqyty rejıminiń saqtalýyna monıtorıng júrgiziledi. Besinshiden, memlekettik organdardaǵy basqarýshy jáne atqarýshy laýazymdar sany retteledi. Qazirgi kezde, keıbir memlekettik organdarda bir ne eki qyzmetshiden qurylǵan bólimsheler bar. Bizdiń maqsatymyz – memlekettik organdardyń ońtaıly jáne tıimdi qurylymyn qalyptastyrý», - dedi agenttik basshysy.