Prezıdent saılaýy: Jumataı Álıev memlekettik til synaǵyn sátti tapsyrdy

ASTANA. QazAqparat – QR Prezıdenti saılaýyna úmitker Jumataı Álıevtiń memlekettik tildi meńgerý deńgeıi boıynsha emtıhan qorytyndysy belgili boldy, dep habarlaıdy QazAqparat tilshisi.

Qazaqstan Respýblıkasy Ortalyq saılaý komıssııasynyń kezekti otyrysy ótti. Lıngvıstıkalyq komıssııa prezıdenttikke kandıdat Jumataı Álıuly Álıevtiń memlekettik tildi erkin meńgergenin anyqtady.

«Lıngvıstıkalyq emtıhan úsh kezeńde ótkizildi. Jazba jumysy, qazaq ádebıeti klassıkteriniń shyǵarmasynan úzindi oqý jáne kandıdat tańdaǵan taqyryp boıynsha kópshilik aldynda sóz sóıleý. Emtıhan aıaqtalǵan soń, komıssııa kandıdattyń jaýabyn talqylap, qorytyndysyn shyǵardy», - delingen habarlamada.

Memlekettik til boıynsha emtıhan qorytyndysyn lıngvıstıkalyq komıssııanyń tóraǵasy, fılologııa ǵylymdarynyń doktory, professor Ádil Qurmanjanuly Ahmetov baıandady.

«Kandıdat «Túrkistan – er túriktiń besigi» taqyrybynda jazba jumysyn oryndady. Jumys mazmuny, stıli, emlesi, tynys belgileri boıynsha baǵalandy. Ekinshi tapsyrma boıynsha Muqaǵalı Maqataevtyń «Aqqýlar uıyqtaǵanda» poemasynan úzindi oqydy. Úshinshi tapsyrma boıynsha «Adal eńbek – ıgilik kózi» taqyrybyna kópshilik aldynda sóıledi», - deıdi ol.

Ortalyq saılaý komıssııasynyń resmı aqparatyna sáıkes, emtıhan qorytyndysy boıynsha lıngvıstıkalyq komıssııanyń eki múshesi qalys qala otyryp, kandıdat Jumataı Álıuly Álıevtiń memlekettik tildi meńgergendigi týraly kópshilik daýyspen sheshim qabyldady.

Foto: Keden.kz