Prezıdent saılaýy evolıýtsııalyq ilgerileýge múmkindik beredi - Ǵosman Tóleǵul
«Elbasynyń kóregendikpen, danalyqpen bılik tizginin demokratııalyq jol arqyly halyqtyń quzyryna, kópshiliktiń tańdaýyna usynýy, shyn máninde, tarıhı sheshim boldy. Qazirgi barsha qazaqstandyqtardyń murat-múddesi obektıvti túrde sol tańdaýdy júzege asyryp, ózindik tańdaý jasaý. Jáne de bul jerdegi olardyń basshylyqqa alatyn eń ózekti máselesi - qoǵam ómirindegi sabaqtastyqty saqtap, buǵan deıingi el ekonomıkasynyń damý úrdisin, áleýmettik birlik pen turaqtylyqty, jasampazdyqty odan ári jalǵastyrý», - deıdi Ǵosman Tóleǵul.
Sondaı-aq, ol bul joldyń evolıýtsııalyq ilgerleýge múmkindik beretindigin atap kórsetti.
«Bul paıymdy qoǵamymyzda ornyqqan qasıetti uǵym - halyqtar dostyǵy haqynda da, ony sanamyzdyń týy deńgeıine kóterip otyrǵan Qazaqstan halqy Assambleıasy týrasynda da aıtqan oryndy. Onyń atqaryp otyrǵan sharýasy ulan-ǵaıyr ekenine kýá bolyp júrmiz. Óz basym sonyń bir ǵana mysaly - «Qazaqtaný» jobasyn erekshe aıtar edim. Byltyr mamyr aıynda Býrabaıdaǵy Abylaı han alańynda osy jobanyń saltanatty túrde tusaýy kesilip, bata berildi. Bul joba elimizdiń barlyq qaýymyna qazaq halqynyń tarıhyn, mádenıetin, fılosofııasyn, etıkasyn nasıhattaýǵa, sondaı-aq ultymyzdyń qundylyqtaryn, onyń tarıhy men salt-dástúrlerin qoǵamymyzdaǵy jalpy qundylyq ózeginiń biriktirýshi róli etýge baǵyttalǵan. Atalmysh protsess te ómirdiń sapaly satysyna kóterilýdiń, alda saılanatyn prezıdenttiń aldynda turǵan orasan zor jumystyń alǵysharty men negizi bolýy tıis», - deıdi ol.
Sonymen qatar, ol maqsatymyz - elimizdi mekendegen barsha ulttar men ulystardyń ulttyq qundylyqtarymyzdy, qasıetti qazaq tilin tolyq ıgerýine jaǵdaı jasaý ekendigin atap ótti.
«Sonda memlekettik tutastyq, eldik qýat, jasampazdyq áleýet tıisti dárejesine jeterine kúmán bolmaıdy. Endeshe, osynaý uly murat úshin daýys bereýge de, saılaýǵa túgel qatysýǵa negiz bar», - deıdi Ǵ. Tóleǵul.