Prezıdent saılaýy: Almatyda Asanáli Áshimov daýys berdi

ALMATY. QazAqparat - Qazaqstannyń Eńbek Eri, KSRO Halyq ártisi Asanáli Áshimov «Samal» shaǵyn aýdanynda ornalasqan №382 saılaý ýchaskesine baryp, Prezıdent bolýǵa laıyqty sanaǵan úmitkerin tańdady, dep habarlaıdy QazAqparat tilshisi.

«Halyqtyń ál-aýqaty, kóńil-kúıi túzelmeı bereke bolmaıdy. Kóńil-kúı jaqsy bolǵan kezde ǵana jumysta bereke bolady. Bul — bir. Ekinshiden, ǵylym, bilim, mádenıetti damytý kerek. Ulylardyń aıtýynsha, mádenıetsiz, ádebıetsiz el – el emes degen. Sondyqtan men tańdaǵan kandıdat osyǵan kóp kóńil bóledi dep men senemin. Keleshek úshin adal qyzmet isteıdi dep oılaımyn», - dedi Qazaqstannyń Eńbek Eri, KSRO Halyq ártisi Asanáli Áshimov. Eske salaıyq, Almatyda 600 saılaý ýchaskesi jumys istep tur. Qalada 1 mıllıon 176 myńnan astam adam daýys bere alady. Al turǵylyqty tirkeýi joq azamattar úshin 55 daýys berý ýchaskesi jumys isteýde.