Prezıdent Saraıshyq ortalyǵy qurylysyna qatysty máseleni dereý sheshýdi tapsyrdy

NUR-SULTAN. QazAqparat – Saraıshyqtyń mańyzdylyǵy men tanymaldyǵyn arttyrý úshin zamanaýı týrızm ınfraqurylymy qajet. Bul týraly búgin Atyraý oblysynyń áleýmettik-ekonomıkalyq damý máseleleri jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Atyraý óńirinde qasterli ári tarıhı oryndar kóp. Sonyń biri – ejelgi Saraıshyq qalasy boı kótergen jer. Altyn Orda dáýirinde mańyzdy ról atqarǵan shahardyń Qazaqstan aýmaǵynda ornalasýy tegin emes. Bul tól tarıhymyzdyń tamyry tereń ekenin kórsetedi. Bizdiń babalarymyz qala salyp, jańa mádenıetke jol ashqan. Áıgili Saraıshyq – sonyń aıqyn dáleli. Munda Altyn Orda dáýiriniń handary jáne qazaqtyń uly hany Qasym han jerlengeni belgili. Jalpy, ulan-baıtaq jerimizdegi kóne shaharlardy, memlekettigimizdiń tarıhynda aıryqsha orny bar Altyn Ordany jan-jaqty zerttep, ǵylymı aqparattyq jumystardy júıeli júrgizý kerek. Sol arqyly eldik shejiremizdi keńinen tanyta alamyz. Osyny jas urpaqtyń sanasyna sińirýimiz kerek», - dedi Memleket basshysy.

QR Prezıdenti Saraıshyqtyń mańyzdylyǵy men tanymaldyǵyn arttyrý úshin zamanaýı týrızm ınfraqurylymy qajet ekendigin basa aıtty.

«Ákimdik Úkimetten vızıt-ortalyq qurylysyna qarajat suraǵan eken. Biraq, kelisimin áli almaǵan. Úkimetke osy máseleni dereý sheshýdi tapsyramyn», - dedi Qasym-Jomart Toqaev.