Prezıdent: «Saran» ındýstrııalyq aımaǵy sheteldik kompanııalar shoǵyrlanatyn alańǵa aınalýy kerek

QARAǴANDY. QazAqparat – Prezıdent Qasym-Jomart Toqaev Qaraǵandy oblysyndaǵy «Saran» ındýstrııalyq aımaǵynyń ınfraqurylymyn sheteldik kompanııalardyń shoǵyrlanýyna yńǵaılap jasaýdy tapsyrdy, dep habarlaıdy QazAqparat tilshisi.

«Memlekettiń mindeti – orta jáne joǵarǵy bólinis taýarlarynyń óndirisin ulǵaıtýǵa qolaıly jaǵdaılar jasaý.

Qaraǵandy oblysynda «Saryarqa» arnaıy ekonomıkalyq aımaǵy men «Saran» ındýstrııalyq aımaǵynyń aýmaǵynda keleshegi bar birqatar ónerkásip jobasy iske asyrylyp jatyr, iri kásiporyndar iske qosyldy. Olar sheteldik kompanııalardyń shoǵyrlaný alańy bola alady jáne solaı bolýy kerek. Tek tıisti jaǵdaı jasalýy qajet», - dedi Prezıdent óńir jurtshylyǵymen kezdesý barysynda.

Qasym-Jomart Toqaev atalǵan jumystar keler jyly máresine jetýi kerektigin tapsyrdy.

«Úkimetke 2023 jyly «Saran» ındýstrııalyq aımaǵynyń ınfraqurylymyn qalyptastyrýdy aıaqtaý tapsyrylady», - dedi Memleket basshysy.

Foto:t.me/bort_01