Prezıdent Samuryq-Qazynanyń Nursultan Nazarbaev basqaratyn keńesin taratyp jiberdi

<p>Memleket basshysy Qasym-Jomart Toqaev Tuńǵysh Prezıdent Nursultan Nazarbaev tóraǵalyq etetin &laquo;Samuryq-Qazyna&raquo; qorynyń basqarma keńesin taratyp jiberdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Samuryq-Qazyna» qory baspasóz qyzmetiniń málimetinshe, Qazaqstan Prezıdenti qor týraly zańǵa ózgerister men tolyqtyrýlar engizetin qujatqa qol qoıǵan. 

«Ulttyq ál-aýqat qory týraly» 2012 jylǵy 1 aqpandaǵy zańda 6-1-bap (qordy basqarý jónindegi keńes) alynyp tastalsyn» delingen jańa qujatta.

Qordy basqarý jónindegi keńes – qor qyzmetiniń básekege qabileti men tıimdiligin arttyrý boıynsha usynys ázirleıtin konsýltatıvtik-keńesshi organ edi.  

Aıta keteıik, búgin Memleket basshysy «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń Ulttyq qorynan balalarǵa arnalǵan qarajatty esepteý, tóleý jáne paıdalaný máseleleri boıynsha ózgerister men tolyqtyrýlar engizý týraly» zańǵa qol qoıdy. 

Bul zańda Tuńǵysh Prezıdent Nursultan Nazarbaevty Qordy basqarý jónindegi keńes quramynan shyǵaratyn «Ulttyq ál-aýqat qory týraly» zańǵa kirgen túzetýler de bar.