Prezıdent Sábıt Muqanov atyndaǵy Qazaq sazdy-drama teatrynda zııaly qaýym ókilderimen kezdesti

PETROPAVL. QazAqparat – Memleket basshysy Qasym-Jomart Toqaev Soltústik Qazaqstan oblysynyń ortalyǵynda jańadan boı kótergen S. Muqanov atyndaǵy Qazaq sazdy-drama teatryna bardy, dep habarlaıdy QazAqparat Aqordaǵa silteme jasap.

Prezıdent teatr ǵımaratyn aralap kórip, «Maǵjan» pesasynan úzindi tamashalady.

Teatr dırektory Birjan Jalǵasbaev óner ordasynyń ujymy bertinge deıin «Energetıkter saraıyn» panalaǵanyn, osy jyldar ishinde túrli janrda qoıylymdar sahnalap, halyqaralyq, respýblıkalyq baıqaýlarda júlde alǵanyn jetkizdi. Onyń aıtýynsha, jańa ǵımaratqa kóshken ujym repertýaryn jańartýǵa, sheteldik jáne otandyq óner ujymdarymen shyǵarmashylyq baılanys ornatýǵa múmkindik aldy.

Memleket basshysy Qyzyljar ólkesiniń zııaly qaýym ókilderimen jáne qoǵam belsendilerimen áńgimelesti.

«Birligimiz áralýandyqta. Bul – bizdiń eń basty uranymyz ári ustanymymyz. Qazaq bolsyn, basqa ult bolsyn – bárimiz bir halyqpyz. Sondyqtan, bárimiz halqymyzdyń, elimizdiń órkendeýine qyzmet etýimiz kerek. Barshańyzǵa baq-bereke tileımin. Biz árdaıym birge bolamyz. Alǵa qadam basý úshin aýyzbirshiligimizdi, dostyǵymyz ben turaqtylyǵymyzdy kózdiń qarashyǵyndaı saqtaýymyz kerek. Árıne, elimizde áleýmettik-ekonomıkalyq jáne qoǵamdyq sıpattaǵy máseleler bar. Problemasyz el bolmaıdy. Tipti, eń damyǵan, baqýatty elderde de problema bar. Eger elde tártip bolsa, zań qatań saqtalsa, kózdegen nátıjege qol jetkizemiz», - dedi Prezıdent.

Prezıdent qoǵam belsendilerimen eldiń damýy jáne óskeleń urpaq tárbıesi jóninde pikir almasty.

Memleket basshysy qazaq ádebıetiniń jarqyn ókili, aqyn Maǵjan Jumabaevtyń 130 jyldyǵyn joǵary deńgeıde atap ótý qajet ekenin aıtty.