Prezıdent is basqarmasy týrnıri aıasynda qazaq kúresinen myqtylar anyqtaldy
Atap aıtqanda, jyl saıyn Prezıdent is basqarmasy júıesindegi barlyq mekemelerdiń qatysýymen birqatar sport túrinen dástúrli jarystar uıymdastyrylyp keledi. Búgingi saıysqa basqarmanyń túrli bólimshelerinen kelgen 80-ge jýyq balýan boz kilemde baq synasty.
Týrnırdiń ashylýynda QR Prezıdenti Іs basqarmasy apparatynyń basshysy Serik Kenjebaev jarys Respýblıka kúnine oraı ótkizilip jatqanyn atap ótti.
«Qazaq kúresi adamnyń kúsh-jigeri men eptiligin kórsetedi, sondaı-aq bul sport erlik pen tózimdiliktiń, qarsylasqa degen qurmettiń kórinisi. Qazaq kúresi - óte tartymdy sport túri. Bıyl elimizde V Dúnıejúzilik kóshpendiler oıyndary ótti. Sonyń nátıjesinde qazaq kúresi óte tanymal ekenine kózimiz jetti. Bul turǵyda qazaq kúresi qatysýshy eń kóp tirkelgen sport túri atandy», - dedi S. Kenjebaev.
Óz kezeginde Prezıdent is basqarmasy Uıymdastyrý-baqylaý jáne kadr jumysy bóliminiń basshysy Erbol Adaev búgingi jarys óte tartysty ótkenin, sondaı-aq Prezıdent is basqarmasy osyndaı dástúrli týrnırlerdi uıymdastyrýdy jalǵastyra beretinin aıtty.
Týrnırge qazaq kúresi qaýymdastyǵynyń kásibı tóreshileri qazylyq etti. Jarystyń bas tóreshisi, qazaq kúresi qaýymdastyǵynyń menedjeri Ábdirahman Samyrattyń aıtýynsha, búgingi týrnır joǵary deńgeıde uıymdastyryldy.
«82 kelige deıingi jáne 82 keliden joǵary salmaq dárejesinde balýandar qatysty. Jarysqa kelgen 78 sportshynyń daıyndyǵyn jaqsy dep baǵalaımyn. Olar kásibı sportshy bolmasa da, týrnırge tııanaqty daıyndalǵanyn kórip otyrmyz. Byltyr da QR Prezıdenti is basqarmasy qyzmetkerleriniń jarysy bolǵan. Osyndaı týrnırlerdi dástúrli túrde ótkizýdiń arqasynda balýandardyń kúres deńgeıi ósip kele jatyr dep aıta alamyn. Jalpy, mundaı is-sharalar elimizde sporttyń damýyna eleýli úlesin qosady. Búgin sport keshenine ákelerine, aǵalaryna, týstaryna jankúıer retinde biraz bala kelgenin kórip otyrmyn. Olar osyny kórip, óse kele qazaq kúresine barady», - dedi Á. Samyrat.
Tórt saǵatqa jýyq ýaqytqa sozylǵan tartysty týrnırdiń qorytyndysy mynandaı:
82 kelige deıingi salmaq dárejesi:
3-oryn – Nurbolat Qulmanov (QR Prezıdenti teleradıokesheni);
2-oryn – Mereke Murat (Prezıdent ákimshiligi men Úkimetiniń ákimshilik ǵımarattary dırektsııasy);
1-oryn – Raıymbek Julmaǵambetov (Memlekettik rezıdentsııalar dırektsııasy).
82 keliden joǵary salmaq dárejesi:
3-oryn – Baqtııar Serikbaı (Prezıdent is basqarmasy);
2-oryn – Esen Túgelbaı (Prezıdent ákimshiligi men Úkimetiniń ákimshilik ǵımarattary dırektsııasy);
1-oryn – Aman Túgelbaı (Prezıdent ákimshiligi men Úkimetiniń ákimshilik ǵımarattary dırektsııasy).
Sonymen qatar týrnır aıasynda «eń eresek balýan» atalymynda Keńes Musapirov (MTQB Avtosharýashylyǵy) marapattaldy.
Osyǵan deıin álemniń 40-tan astam elinde qazaq kúresi damyp jatqanyn jazǵan edik.
Aıta keteıik, bıyl qazaq kúresi 5-shi Dúnıejúzilik Kóshpendiler oıyndaryndaǵy qatysýshy eń kóp tirkelgen sport túri atandy. Eki kúnge sozylǵan jarystarǵa 41 elden kelgen 274 sportshy qatysyp, 16 salmaq dárejesinde medaldar jıyntyǵy sarapqa salyndy.