Prezıdent is basqarmasy spartakıadasy: ústel tennısinen jarys ótti
Saıystyń saltanatty ashylý rásiminde QR Prezıdenti Іs basqarmasy apparatynyń basshysy Serik Kenjebaev sóz sóıledi.
- Ústel tennısindegi shapshańdyq, sheshimtaldyq, mergendik syndy qasıetter oıynshynyń boıyndaǵy kúsh-jigerin bir maqsatqa jumyldyrýǵa, kedergilerdi jeńýge baýlıdy. Balalar kúni merekesine oraı, biz spartakıada aıasyndaǵy týrnırge Іs basqarmasy júıesinde eńbek etetin azamattardyń balalaryn da qatystyryp otyrmyz, - deı kele, S.Kenjebaev qatysýshylarǵa sáttilik tiledi.
Tartysty básekege QR Prezıdenti Іs basqarmasy ortalyq apparaty, Medıtsınalyq ortalyq, «Qarlyǵash» balabaqshasy, «Oqjetpes» emdeý-saýyqtyrý kesheni, Materıaldyq-tehnıkalyq qamtamasyz etý basqarmasy, Memlekettik rezıdentsııalar dırektsııasy, QR Prezıdentiniń Ákimshiligi men Úkimetiniń ákimshilik ǵımarattary dırektsııasy, Avtosharýashylyq, «Búrkit» avıakompanııasy, Injenerlik-tehnıkalyq ortalyq, «Qazqurylysjúıesi» seriktestigi, «Býrabaı-Damý» seriktestigi, Prezıdent Teleradıokesheni, «Astana-20» memlekettik qory syndy mekemelerdiń mamandarynan quralǵan 14 komanda qatysty. Komandalardyń árqaısysy 3 adamnan jasaqtalǵanyn aıta keteıik.
Týrnır qorytyndysy boıynsha «Oqjetpes» emdeý-saýyqtyrý kesheniniń komandasy bas báıgeni jeńip aldy. Avtosharýashylyq namysyn qorǵaǵan úshtik ekinshi oryndy ıelendi. Júldeli úshinshi oryn Injenerlik-tehnıkalyq ortalyqqa buıyrdy.
«Oqjetpes» oıynshysy Saǵynysh Álıev «Úzdik oıynshy» nomınatsııasyn jeńip alsa, «Tehnıkasy sheber oıynshy» atalymy Injenerlik-tehnıkalyq ortalyq mamany Aıdyn Muhametjanovqa buıyrdy.
6-14 jas aralyǵyndaǵy balalar baq synaǵan básekede birinshi oryndy Gýzal Smaılova, júldeli ekinshi jáne úshinshi oryndardy Mádı Bolat pen Asqar Ahylbek jeńip aldy. «Jeńiske degen jigeri úshin» atalymyna Madııar Qadyrbek, «Eń jas oıynshy» atalymyna qyzdardan 6 jasar Aıbıbi Tilesheva, uldar arasynan 7 jasar Sanjar Maralov laıyq dep tabyldy.
Jeńimpazdar men júldegerlerge arnaıy kýbok pen medaldar, tıisti dıplomdar tapsyryldy.
QR Prezıdentiniń Іs basqarmasy júıesindegi spartakıada aıasynda buǵan deıin toǵyzqumalaq pen shahmattan jarys ótkenin aıta keteıik. Qatysýshylar jyl sońyna deıin shaǵyn fýtbol, voleıbol, qazaq kúresi, bılıard syndy sport túrlerinen saıysady.