Prezıdent reformasyn qoldaýǵa arnalǵan ashyq aspan astyndaǵy kontsertke 25 myń adam jınaldy

NUR-SULTAN. QazAqparat - AMANAT» partııasy QR Prezıdenti Qasym-Jomart Toqaevtyń reformasyn qoldaýǵa arnalǵan «Bereke – birlikte!» atty ashyq aspan astyndaǵy kontsert uıymdastyrdy. Kontsert elordadaǵy EKSPO aýmaǵynda ótip, ony 25 myńnan astam qala turǵyndary men qonaqtary tamashalady.

Óz kezeginde, Parlament Májilisindegi «AMANAT» partııasynyń depýtaty Elnur Beısenbaev prezıdenttik mandatty uzaqtyǵy 7 jyl bir merzimge shekteý jónindegi reformanyń mańyzyn atap ótti.

« Budan bylaı Memleket basshysy tek bir ret qana prezıdent bolý múmkindigine ıe bolady. Ol qaıta saılana almaıdy. Prezıdent bir merzimge, bir-aq ret 7 jylǵa saılanatyn bolady. Zańnamadaǵy quqyqtyq kollızııany joıý úshin, bul ózgeristi, jańashyl saıası reformany bıyldan bastaýmyz qajet. ıAǵnı, aldaǵy 20 jyldyqta siz ben biz, jańadan saılanǵan eń kemi 3 prezıdentti kóretin bolamyz» , – dedi halyq qalaýlysy.

Parlament Májilisindegi «AMANAT» partııasynyń taǵy bir depýtaty Gennadıı Shıpovskıh Memleket basshysynyń Ulttyq qordyń ınvestıtsııalyq tabysynyń 50%-yn 18 jasqa tolǵanǵa deıin balalardyń shotyna aýdarý bastamasyna basa nazar aýdardy.

«Esterińizde bolsa, biz baıaǵydan armandap kelgen dúnıemiz iske asty. Bul Arab elderindegideı ár bala ómirge kelgen kezde, arnaıy shot ashylyp, kámelet jasqa tolǵansha aqsha aýdarylady. Bolashaqta ony árbir jas baspanaly bolýy men bilim alýyna qoldana alady. Bul úshin Ulttyq qordyń ınvestıtsııalyq tabysynyń teń jartysy jumsalady. Memleket basshysynyń bul bastamasy árbir otbasyǵa jasalǵan tikeleı qamqorlyq», – dep atap ótti Gennadıı Shıpovskıh.

«AMANAT» partııasynyń «Jastar rýhy» jastar qanatynyń tóraǵasy Nurjan Jetpisbaevtyń aıtýynsha, elimizde bolyp jatqan oqıǵalarǵa beı-jaı qaramaıtyn belsendi jastar jetip artylady.

«Elimizde otanshyl ári belsendi, myqty jastarymyz jeterlik. Sońǵy 3 jylda bolǵan Arys, Maqtaral oqıǵasy jáne pandemııa kezinde elimiz boıynsha «Jastar Rýhy» uıymy 10 myńnan astam volonterdi toptastyrdy. Qostanaı óńirindegi órt kezinde de bizdiń jastarymyz birige bildi. «AMANAT» partııasy barlyq óńirde gýmanıtarlyq kómek qabyldaý pýnktterine 1 200 tonnadan astam turmystyq jáne qurylys zattaryn jınady. Bul iske árbir aımaqtyń janashyr turǵyny óz úlesin qosty. Eldiń tapsyrǵan amanatyn, meniń jas rýhtastarym Tobyl-Torǵaı jurtyna ýaqytyly tabystady. Memleket basshysy volonterlerimizdiń atqarǵan eńbegin joǵary baǵalap, alǵys aıtty», – dedi Nurjan Jetpisbaev.

Sóıtip, qala turǵyndary men qonaqtarynyń aldynda qazaqstandyq estrada juldyzdary óner kórsetti.

Olardyń arasynda Mıras Júginisov, Nazıma, Ninety One, Aıqyn Tólepbergen, Ernar Aıdar, Dılnaz Ahmadıeva, Yenlik, 2 RAR, De Lacure, Ulyqpan Joldasov, Altynaı Jorabaeva, Beıbit Qorǵan, Qanat jáne Svetlana Aıtbaevtar, Aıdyn Jumabaev, Zarına Omarova, Estaı Muqashev, Maıra Іlııasova, Haırolda Muratbek, Araılym Rahym, sondaı-aq memlekettik akademııalyq fılarmonııanyń ártisteri án shyrqady.