Prezıdent Premer-Mınıstr laýazymyna Bektenovti taǵaıyndaýǵa Májilistiń kelisim berýin surady

<p>ASTANA. KAZINFORM &mdash; Memleket basshysy Qasym-Jomart Toqaev Májilistiń jalpy otyrysynda Premer-Mınıstr laýazymyna Oljas Bektenovti taǵaıyndaý úshin depýtattardyń kelisim berýin surady.</p>

«Men búgin Konstıtýtsııanyń 44-babanyń 3-tarmaqshasyna sáıkes Qazaqstan Respýblıkasynyń Premer-Mınıstri laýazymyna taǵaıyndaýǵa kelisý úshin Oljas Bektenovtiń kandıdatýrasyn Májilistiń qaraýyna usynamyn. Bul kandıdatýrany áýeli «Amanat» partııasy usyndy. Men bul usynyspen kelistim. Oljas Bektenov - tájirıbeli memlekettik qyzmetshi. Onyń Qazaqstan ekonomıkasy jáne basqa da salalary boıynsha bilimi mol, uıymdastyrý qabileti joǵary, tártipti ári adal, eńbekqor azamat. Sondyqtan el ekonomıkasynyń aldynda turǵan maqsattardy júzege asyrýǵa qabileti jetedi dep oılaımyn», - dedi Qasym-Jomart Toqaev. 

Memleket basshysy osy aptadaǵy Úkimettiń keńeıtilgen otyrysynda Mınıstrler kabınetiniń jańa quramyna jańa mindetter júkteletinin aıtty. 

«Sizder kelisim bergen jaǵdaıda, Úkimettiń jańarǵan quramy tabystarymyzdy saqtaı otyryp, Qazaqstandy sapaly damý jolyna shyǵarý úshin bar kúsh-jigerin salady dep senemin. Erteń Úkimettiń keńeıtilgen jıyny ótedi. Sol kezde jańa quramnyń aldynda turǵan mańyzdy mindetterge tolyǵyraq toqtalamyn», - dedi Prezıdent.

Budan buryn habarlanǵandaı, búgin Memleket basshysyna «Amanat» partııasynyń atynan Premer-Mınıstrdiń kandıdatýrasy usynyldy.