Prezıdent pen laýazymdy tulǵalar indetten qaıtys bolǵandardy qurmetpen eske alady- Berik Ýálı
10:31, 13 Shilde 2020
NUR-SULTAN. QazAqparat - Memleket basshysynyń Ókimimen 13 shilde jalpyulttyq aza tutý kúni bolyp belgilengen bolatyn. Osyǵan oraı túngi saǵat 00:00-den bastap elimizdegi barlyq Memlekettik Tý tómen túsirildi, dep jazdy búgin óziniń Facebook paraqshasynda QR Prezıdentiniń baspasóz hatshysy Berik Ýálı.
Al búgin Nur-Sultan qalasynyń ýaqytymen saǵat 12:00-de respýblıka boıynsha koronavırýs pandemııasynyń qurbandaryn bir mınýt únsizdikpen eske alý jarııalandy.
Jalpyulttyq aza tutý kúnine oraı Prezıdent Qasym-Jomart Toqaev pen elimizdiń ózge de laýazymdy tulǵalary Aqorda rezıdentsııasynyń aldynda indetten qaza bolǵan azamattardy qurmetpen eske alady.
«Іndet qurbandaryn únsiz eske alý rásimi respýblıkanyń barlyq aımaǵynda ótedi. Qurbandarǵa taǵzym sharasyn respýblıkalyq arnalar tikeleı efır arqyly kórsetedi», dep jazdy Berik Ýálı.