Prezıdent pen quzyrly organdar membılik júıesine konstıtýtsııalyq deńgeıde ense, barlyǵy óz ornyna keledi - Saılaýbek Álibekov
«Prezıdent usynysy burynnan suranyp turǵan másele bolatyn. Men ózim, Prezıdentti QR Konstıtýtsııasynyń 3-shi babyna, Memlekettik bılik júıesine qosýdy qoldaıtyndardanmyn. Bizde, ókinishke oraı, menińshe, Prezıdent zańnamalyq turǵyda alystatylǵan. Osy jaǵdaı bizdiń ómirimizge áser etip otyr. 3-shi bapty qarasańyz, Respýblıkada memlekettik bılik birtutas, ol Konstıtýtsııa men zańdar negizinde zań shyǵarýshy, atqarýshy jáne sot tarmaqtaryna bóliný, olardyń tejemelik ári tepe-teńdik júıesin paıdalaný arqyly, ózara is-qımyl jasaý prıntsıpine sáıkes júzege asyrylady dep jazylǵan. 40-shy bapty qarańyz, onda Qazaqstan Respýblıkasynyń Prezıdenti - memlekettiń basshysy, memlekettiń ishki jáne syrtqy saıasatynyń negizgi baǵyttaryn aıqyndaıtyn, el ishinde jáne halyqaralyq qatynastarda Qazaqstannyń atynan ókildik etetin eń joǵary laýazymdy tulǵa dep jazylǵan. Osy eki bapty baılanystyrý qajet. Buǵan qarasań, bizdiń memlekettik bılikti bıliktiń úsh tarmaǵy ǵana tanytatyn sekildi. Eger, prezıdent pen oǵan quzyrly organdar memlekettik bılik júıesine konstıtýtsııalyq deńgeıde enetin bolsa, menińshe barlyǵy óz ornyna keledi. Árıne, kóp másele bar, onyń ishinde 26-shy bapqa qatysty da pikirler aıtylyp jatyr. Menińshe, bul jerde asyra silteýdiń qajeti joq. Jekemenshikti barlyq azamattarǵa engizýge sheteldikterge de engizýge bolady. Sheteldikter jekemenshikti ıemdenedi degen durys bolmaıdy. Bul meniń usynysym. Logıkalyq túrde alyp qarasyńyz, memlekettik bılik birtutas. Memlekettik bıliktiń birden-bir bastaýy - halyq. Ony Prezıdent basqarady. Al Prezıdent memleket basqarý júıesine enbegen. Sondyqtan, osy baptardy sáıkestendirý kerek. Osydan keıin aqyryndap, bılik tarmaqtaryn Parlament pen Úkimetke berý bastalady. Áıtpese, ol memlekettik bılikten, bıliktiń úsh tarmaǵynan joǵary tur. Konstıtýtsııada bılik birtutas delingen. Onda Prezıdent qaıda qalady? Osy máselelerdi rettep alý kerek», - dedi QazAqparat tilshisine bergen suhbatynda zań ǵylymdarynyń doktory Saılaýbek Álibekov.