Prezıdent: Pavlodar – Qazaqstannyń damýynda mańyzy joǵary aımaq
«Pavlodar – Qazaqstannyń damýynda úlesi mol, mańyzy joǵary aımaq. Ózderińiz bilesizder, ótken aptadan beri óńirlerge saparym bastaldy. Aımaqtardaǵy halyqpen kezdesip, el damýyna qatysty bastamalarym týraly aıttym. Aldymen Túrkistan men Shymkentke, sodan keıin Semeıge bardym.
Biz aldaǵy qysqa daıyndyq barysymen tanysyp, shuǵyl máselelerdi qaradyq. Oblystar úshin strategııalyq mańyzy bar mindetterdi aıqyndadyq. Bir sózben aıtqanda, bul – óte maǵynaly saparlar bolyp jatyr», - dedi Prezıdent.
Sondaı-aq, Memleket basshysy tyń ózgeristerge qoldaý bildirgen azamattarǵa alǵys bildirdi.
«Shyn máninde, halyqtyń qoldaýy – reformalardy tabysty júzege asyrýdyń eń basty kepili. Men tyń ózgeristerge tilektes bolyp jatqan azamattardyń bárine taǵy da alǵys aıtqym keledi. Biz bir el bolyp jumyla bilsek, kózdegen maqsatqa jetemiz. Búgin, mine, ózderińizben júzdesý úshin Ertis boıyna at basyn burdym. Bul óńirge meniń yqylasym erekshe ekenin bilesizder. Pavlodar oblysy – elimizdiń eń kórikti mekenderiniń biri», - dedi Qasym-Jomart Toqaev.
Foto: ticketon.kz