Prezıdent otandyq qorǵanys ónerkásibi kesheniniń áleýetimen tanysty

ASTANA. QazAqparat - Oqý-jattyǵý jıyny barysynda Memleket basshysy – Qarýly Kúshterdiń Joǵarǵy Bas qolbasshysy Qasym-Jomart Toqaevqa otandyq qorǵanys ónerkásibi kesheni kásiporyndarynyń qarý-jaraq pen áskerı tehnıka shyǵarý jáne jóndeý múmkindikteri tanystyryldy.

Bul týraly QazAqparat Aqordanyń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, dalada uıymdastyrylǵan arnaıy alańqaıda Ortalyq Azııa aımaǵyndaǵy brondy tehnıkalardy jóndeýge mamandanǵan jalǵyz «Semeı ınjınırıng» (Semeı) zaýyty brondy jóndeý-evakýatsııalyq transporttaý mashınasyn paıdalana otyryp, urysta zaqymdanǵan tehnıkany qaıta qalpyna keltirý barysyn kórsetti.

«Navyco» kompanııasynyń ókili (Astana) brondy tehnıkany qalpyna keltirýge arnalǵan agregattardyń dala jaǵdaıynda qalaı aýystyrylatyny, al «KamAZ Injınırıng» (Kókshetaý) jáne «№405 avıajóndeý zaýyty» (Almaty) kásiporyndary áskerı tehnıkany qurastyrý, qalpyna keltirý múmkindikteri jóninde málimet berdi.

Kórmege Qazaqstan men Túrkııanyń «Qazaqstan Aselsan ınjınırıng» (Astana) birlesken kásiporny, «Vostok Polımer Snab» JShS (Óskemen), «Universal-Build» JShS (Almaty), «Energy General» JK (Almaty) jáne basqa da kásiporyndardyń ónimderi qoıyldy.

Prezıdentke túrkııalyq «Otakar» kompanııasy shyǵaratyn ARMA brondy mashınasynyń sý kedergilerinen ótý múmkindikteri tanystyryldy.

Kórmeni aralap kórgen Memleket basshysy otandyq qorǵanys ónerkásibiniń áleýetin arttyrý mańyzdy ekenin atap ótti.

Osyǵan deıin Qasym-Jomart Toqaevtyń «Batyl toıtarys-2023» áskerı oqý-jattyǵý jıynyna barǵanyn jazdyq.