Prezıdent: Óskeleń urpaqty el isine baýlý – óte mańyzdy másele

ASTANA. QazAqparat – Saılaýshylar óziniń muń-muqtajyn biletin jáne múddesin qorǵaı alatyn azamattarǵa daýys berdi. Bul týraly Parlament palatalarynyń birlesken otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Elimizdiń jastary árdaıym meniń aıryqsha nazarymda ekeni barshaǵa málim. Men bılikke oıy ozyq, bilimdi jastar kelýi kerek dep únemi aıtamyn. Óskeleń urpaqty el isine baýlý – óte mańyzdy másele. Olar qoǵamǵa jańa qundylyqtar ákelýge tıis. Saılaý kezinde jas kandıdattar birigip, óz tobyn qurǵany belgili. Osy odaqtyń belsendi músheleri Parlamentke jáne máslıhattarǵa ótti. Osylaısha, ókildi bılik tarmaǵyna saıasatkerlerdiń jańa býyny kelip jatyr. Jastar muny elimizdi damytýǵa berilgen biregeı múmkindik dep baǵalaýy qajet», - dedi Memleket basshysy.

Sondaı-aq, Qasym-Jomart Toqaev áıelderdiń jáne erekshe qajettiligi bar jandardyń Májiliske ótýine jaǵdaı jasalǵanyna toqtaldy.

«Saıası naýqan qoǵamdaǵy árbir azamat Parlamentke múshe bola alatynyn jáne «áleýmettik lıft» jumys isteıtinin aıqyn ańǵartty. Ádiletti qoǵamnyń qalyptasýy degenimiz – osy! Bul saılaý úmitkerlerge qoıylatyn talap ózgergenin kórsetti. Qazir turǵyndarmen tyǵyz qarym-qatynas ornatý óte mańyzdy. Muny durys túsinip, elmen etene aralasa bilgen úmitkerler halyq saılaǵan ókil atandy. Saılaýshylar óziniń muń-muqtajyn biletin jáne múddesin qorǵaı alatyn azamattarǵa daýys berdi», - dedi Prezıdent.