Prezıdent Ortalyq Azııa men Aýǵanstan úshin Turaqty damý ortalyǵyn qurýdy usyndy
Prezıdenttiń aıtýynsha, Turaqty damý maqsattary jóninen ótken alǵashqy forým 2019 jylǵy Astana ekonomıkalyq formýynyń negizgi is-sharasyna aınaldy.
«Bıyl shilde aıynda biz alǵash ret erikti túrde, Qazaqstannyń jetistikteri men sheshilmegen máseleleri jáne aldaǵy on jyldyqta jasalýy tıis múmkindikter boıynsha ulttyq sholý jasadyq», - dedi Prezıdent óz sózinde.
Memleket basshysy Turaqty damý maqsattarynyń, jalpy planetanyń kelbetin qalyptastyratyn ózara baılanysyna nazar aýdara otyryp, jekelegen sanattardyń nemese elderdiń jetistigine qanaǵat tutyp qarap otyrýǵa bolmaıtynyn da aıtty.
Bul máselede Memleket basshysy Qazaqstannyń Turaqty damý maqsattaryn aımaqtyq jáne halyqaralyq deńgeıde belsendi júzege asyryp jatqanyna toqtaldy. Osy oraıda, Qasym-Jomart Toqaev birqatar sharany iske asyrýdy usyndy.
Memleket basshysynyń aıtýynsha, birinshiden, Turaqty damý maqsattaryna bólinetin qarjy resýrstarynyń tıimdi jumsalýyn qamtamasyz etý qajet. Ekinshiden, Qasym-Jomart Toqaev Qazaqstannyń Tuńǵysh Prezıdenti Nursultan Nazarbaevtyń bastamasymen qurylǵan azyq-túlik qaýipsizdigi jónindegi Islam Uıymynyń shóleıttený, jasyl jelekti qalpyna keltirý, erozııa, tuzdaný, sondaı-aq áleýmettik qaýipsizdikti qamtamasyz etý máselelerin sheshýge baǵyttalǵan maqsattarynyń mańyzdylyǵyn atap ótti.
Taǵy bir pármendi shara retinde Prezıdent Ortalyq Azııa memleketteri men Aýǵanstan úshin Turaqty damý ortalyǵyn qurýdy atap ótti.
«Bul Turaqty damý maqsattaryn tek Qazaqstanda ǵana emes, sonymen qatar, basqa da Ortalyq Azııa memleketteri men Aýǵanstanda júzege asyrýdy jedeldetetin edi», - dedi Memleket basshysy.
Prezıdent atap ótkendeı, búkil aımaqty órkendetý úshin eń aldymen yntymaqtastyq pen seriktestik qajet.
«Búgin biz óz mindettemelerimizdi naqty is-áreketterge aınaldyrý úshin osy mańyzdy múmkindikti paıdalanamyz. Bizdiń árqaısymyz qaýipsiz álemge, ınklıýzıvti ósimge, bolashaq urpaǵymyzdyń múddesi úshin turaqty damýǵa úles qosýǵa moraldyq turǵyda mindettimiz», - dep túıindedi Memleket basshysy.
Eske sala ketsek, buǵan deıin Qazaqstan Prezıdenti Qasym-Jomart Toqaev Nıý-Iorkte ótken BUU Bas Assambleıasynyń Jalpy debattarynda sóz sóılegenin habarlaǵan bolatynbyz.
BUU Bas Assambleıasy aıasynda Qasym-Jomart Toqaev Bolgarııa Prezıdenti Rýmen Radevpen, Polsha Prezıdenti Andjeı Dýdamen, Grýzııa Prezıdenti Salome Zýrabıshvılımen, Ýkraına Prezıdenti Vladımır Zelenskıımen kezdesti.