Prezıdent: Germanııamen aýqymdy seriktestik ornatý – Qazaqstan men Ortalyq Azııa memleketteri úshin basty basymdyq

<p>ASTANA. KAZINFORM &ndash; Sammıtti ashqan Qasym-Jomart Toqaev jıynǵa qatysqany jáne óńirlik kooperatsııaǵa qoldaý kórsetkeni úshin Federaldyq kantsler Olaf Sholts pen Ortalyq Azııa memleketteriniń basshylaryna rızashylyǵyn bildirdi. Prezıdent byltyr qyrkúıekte Berlınde bastalǵan joǵary deńgeıdegi dıalog turaqty jáne senimdi sıpatqa ıe bolǵanyn atap ótti. Bul týraly Aqordanyń baspasóz qyzmeti málim etti.&nbsp;</p>

– Bul Ortalyq Azııa memleketteri men Germanııanyń óńirlik strategııalyq seriktestikti jan-jaqty damytýǵa múddeliligi men umtylysyn aıǵaqtaıdy dep sanaımyn. Bizdiń kezdesýimiz birlesken jumysty qorytyndylap qana qoımaı, kooperatsııany odan ári tereńdetýdiń jańa baǵyttaryn aıqyndaýdy maqsat etedi. Búgin saýda, ınvestıtsııa, energetıka, ekologııa, kólik-logıstıka, bilim-ǵylym sııaqty salalarǵa qatysty mańyzdy máselelerdi talqylaımyz. Syndarly pikir almasýlar elderimizge paıda ákeletin sheshimder shyǵarýǵa yqpal etetinine senimdimin, – dedi Qasym-Jomart Toqaev.

Memleket basshysynyń pikirinshe, búgin «Ortalyq Azııa – Germanııa» formatyndaǵy kópjaqty yntymaqtastyq tarıhynda jańa kezeń bastalady.

Foto: Aqorda

– Germanııanyń áleýmettik-ekonomıkalyq, ǵylymı-tehnıkalyq turǵydan damýy kóptegen memleketke jaqsy úlgi. Nemis tehnologııasy men ınvestıtsııasy ekonomıkanyń túrli salasyna oń áser etip otyr. Biz Germanııanyń óńirimizdegi barlyq memleketpen teńquqyly seriktestikti damytýǵa nıet tanytqanyn joǵary baǵalaımyz. Oǵan Germanııanyń sotsıal-demokratııalyq partııasy qabyldaǵan «Ortalyq Azııa: baılanys jáne múmkindik» atty baǵdarly qujaty dálel bola alady, – dedi Qazaqstan Prezıdenti.

Qasym-Jomart Toqaev elimiz «Tabysty Ortalyq Azııa – tabysty Qazaqstan» formýlasyna saı «Ortalyq Azııa plıýs» formatyndaǵy yntymaqtastyqty nyǵaıtýǵa umtylatynyn jetkizdi. Sondyqtan álemniń eń damyǵan memleketi ári Eýropa Odaǵynyń iri ekonomıkasy sanalatyn Germanııamen keń aýqymdy seriktestik ornatý – Qazaqstan men Ortalyq Azııa memleketteri úshin basty basymdyq.