Prezıdent Orbis Kazakhstan kompanııalar tobynyń negizin qalaýshy Farrýh Mahmýdovty qabyldady
Memleket basshysyna Orbis Kazakhstan kompanııasy jumysynyń nátıjeleri men damý perspektıvalary jóninde málimet berildi.
Atap aıtqanda, Farrýh Mahmýdov Almaty ındýstrııalyq parkinde tolyq tsıkldi avtomobıl zaýytyn salý jospary jaıynda baıandady. Joba aıasynda QHR-dyń Exeed jáne Kaiyi sekildi brendteri bir óndiris alańynda birigedi. Qytaılyq seriktestermen kólikti usaq bólshekterden qurastyrý týraly tolyqqandy kelisim jasalǵan. Bul jobaǵa salynǵan ınvestıtsııanyń jalpy kólemi – 72 mıllıard teńge. Bastapqy kezeńde 1500 jańa jumys orny ashylady. Zaýyttyń óndiristik qýaty jylyna 80 myń avtomobıl shyǵarýǵa jetedi. Ónim ishki jáne syrtqy naryqta satylady, sonyń ishinde Ortalyq Azııa men Kavkaz aımaǵy elderine eksporttalady.
Qasym-Jomart Toqaevqa kompanııanyń Astana qalasyndaǵy ınfraqurylymdardy damytý isine qatysýy jóninde málimet berildi. Bıyl kásiporyn saýda-bazar keshenin salyp bitirýdi jáne kópbeıindi medıtsınalyq klınıka qurylysyn bastaýdy, sondaı-aq Agro Park kóterme saýda jáne taýar taratý ortalyǵynyń qurylysyna kirisýdi josparlap otyr.
Budan bólek, kompanııalar toby Almatynyń týrızm klasterin damytýǵa qatysty birqatar jobany júzege asyryp jatyr. Naqtyraq aıtqanda, ońtústik astananyń sımvoly ári tarıhı ǵımaraty sanalatyn Almaty qonaq úıine rekonstrýktsııa jasaý jumystary bastalǵan. «Prosveşenets» rekreatsııalyq ortalyǵy men Qonaev qalasyndaǵy kópfýnktsıonaldy demalys ortalyǵynyń qurylysy júrgizilýde.
Sonymen qatar Memleket basshysyna kompanııanyń Batys Qazaqstan oblysyndaǵy Aqsý jáne Keńtúbek eldi mekenderinde sý tasqyny saldaryn joıýǵa úles qosqany jóninde baıandaldy. Farrýh Mahmýdov otandyq bızneske udaıy qoldaý kórsetetini úshin Prezıdentke alǵys aıtty.
Kezdesý sońynda Qasym-Jomart Toqaev kompanııanyń bastamalaryn oń baǵalap, jańa jobalardy júzege asyrý isine tabys tiledi.