Prezıdent Ońtústik jáne Batys óńirlerdi damytýǵa arnalǵan baǵdarlama ázirleýdi tapsyrdy

NUR-SULTAN. QazAqparat – Memleket basshysy Qasym-Jomart Toqaev Qazaqstannyń ońtústik jáne batys óńirlerin damytýǵa arnalǵan áleýmettik jáne bıznes baǵdarlamasyn qaıta qaraýdy júktedi, dep habarlaıdy QazAqparat tilshisi.

«Qazaqstannyń óńirleri birdeı deńgeıde damyp jatqan joq. Sonyń saldarynan keıbir óńirlerde áleýmettik olqylyqtar baıqalady. Sońǵy kúnderi bolǵan eldegi jaǵdaı batys jáne ońtústik óńir halqyn eńbekpen qamtý deńgeıiniń tómendigin kórsetti. Atalǵan óńirlerde bala týý deńgeıi joǵary, al ekonomıka óńir turǵyndaryn jumyspen qamtyp úlgere almaı jatyr. Sondyqtan da batys jáne ońtústik oblystardyń áleýmettik problemasy óńirlik emes ulttyq másele bolyp otyr. Áleýmetten bólek, densaýlyq saqtaý, bilim men mádenıetti de umytpaý kerek», - dedi Qasym-Jomart Toqaev.

Memleket basshysynyń aıtýynsha, bilimdi ult kez kelgen básekelestikke tótep bere alady.

«Osy oraıda Úkimetke elimizdiń ońtústik jáne batys óńirleri úshin «Aýyl – el besigi», bıznestiń jol kartasy jáne taǵy sol sııaqty jeke baǵdarlama ázirleýdi tapsyramyn. Jalpy óńirlerdiń damýy men qoldaý ákimderge baılanysty», - deıdi ol.