Prezıdent óńir ákimderine mektep salýǵa jer telimin aldyn ala bólýdi tapsyrdy

NUR-SULTAN. QazAqparat – Turǵyn úı alaptary boı kótergen kezde onymen birge mindetti túrde mektep pen balabaqsha salynýy kerek. Bul týraly Ulttyq qoǵamdyq senim keńesiniń 6-otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Mekteptegi oryn tapshylyǵy óte ózekti másele. Men bıylǵy Joldaýymda 2025 jyldyń sońyna deıin 1 myń mektep salý týraly tapsyrma berdim. Bul - mańyzdy mindettiń biri. Jaýapty memlekettik organdardyń jumysy osy tapsyrmany sapaly ári tıimdi oryndaýyna qaraı baǵalanady. Qazir mektep salý úshin jer telimin alý aıtarlyqtaı qıyndyq týǵyzatyn boldy. Óńir ákimderine barlyq mektepke jer telimin aldyn ala bólýdi tapsyramyn», - dedi Memleket basshysy.

QR Prezıdenti eldi mekenniń josparyn jasap, turǵyn úı salǵan kezde áleýmettik nysan salý qajettigi eskerilýi tıistigin basa aıtty.

«Bul zańnamada kórsetilgen talap. Biraq, jergilikti atqarýshy organdar belgilengen talapty oryndaı bermeıdi. Taǵy da qaıtalap aıtamyn, turǵyn úı alaptary boı kótergen kezde onymen birge mindetti túrde mektep pen balabaqsha salynýy kerek. Úkimetke zańnyń saqtalýyn qatań baqylaýdy tapsyramyn», - dedi Qasym-Jomart Toqaev.